Жаңа жыл қарсаңында қалада әлеуметтік тұрғыдан аз қамтылған отбасыларға азық-түлік себеті таратылды
Қиын жағдайда өмір сүріп жатқан қазақстандықтарға көмек көрсету Qazaq Oil компаниясы үшін дәстүрге айналған дүние. Биыл төртінші жыл қатарынан азық түлік себеттері аз қамтылған отбасыларға жөнелтілді.
- Акция шеңберінде төрт мыңға жуық отбасы азық түлікпен қамтылды. Бүгін 1000 себет Астананың бес ауданындағы отбасыларға жіберілді. Көбінесе жалғызбасты аналар, мүмкіндігі шектеулі отбасылар, мүгедек балаларды асырап отырған отбасыларға көмек көрсетілді. Бұл себеттерге тұрмысқа қажетті басты азық түлік май, қант, ұн, сүт тағы басқа қажетті азық түлік салынды, – деді Астана әкімінің кеңесшісі Қуаныш МОЛДАБЕК.
Оның айтуынша, бүгін жалпы салмағы 45 тонна болатын себет жинақталды.
- Qazaq Oil компаниясына осындай қайырымдылық шарасына қатысқаны үшін алғыс айтамыз. Сонымен қатар, басқа да бизнес өкілдерін, жомарт адамдарды, демеушілерді осы игі шараға қатысуға шақырамыз. Қала әкімдігі осындай шараны жылда ұйымдастырады, - деді Қуаныш Қайратұлы.
Qazaq Oil компаниясы мен Астана әкімдігі биыл қайырымдылық көмек туралы меморанумға қол қойған болатын. Атап айтқанда, әлеуметтік тұрғыдан аз қамтылған отбасыларға адресті әлеуметтік көмек ретінде азық түлік себетін тарату қолға алынған болатын.
- Біз әлеуметтік салаға бағытталған компания ретінде Қазақстан халқының алдында осы жауапкершілікті терең түсінеміз. Бір жағынан осы қайырымдылық шарасын насихаттау мақсатында да өткіземіз. Осындай шараны өткізетін кез келген компания шынайы көңілмен өткізеді деп ойлаймын. Біз қазақстандықтардың тұрмысына бей жай қарай алмаймыз. Осы акция басқа компанияларға үлгі болады деп сенеміз. Әлбетте, бұл бір реттік қана шара емес. Дәстүрлі түрде көмек көрсететін боламыз. Астана әкімдігі бізге арнайы адрестер береді. Біз азық түлікті жеткіземіз, – деді Qazaq Oil өкілі.
Жыл бойы Астанада 4000 жуық отбасыға жалпы сомасы 120 млн теңге болатын қайырымдылық шарасы ұйымдастырылды. Одан бөлек, Qazaq Oil Абай және Қостанай облысындағы өрттен жапа шеккен отбасыларға көмек ретінде 50 млн теңгеден қаржылай көмек көрсетті.
Барлық автожанармай құю станцияларында мұқтаж адамдарға арналған арнайы бокстар орнатылған. Сол қорапқа түскен қаражаттан биыл қазанда Қарағандыдағы перинаталды орталыққа арнайы құрал сатып алу үшін 5,7 млн теңге бөлінді.
Компания қызметкерлері қан және плазма өткізу бойынша қайырымдылық бастамасын белсенді қолдап отыр. Qazaq Oil белсенді түрде спорт саласына қолдайды.
Атап айтқанда, Паралимпиадалық комитет, су спорт түрлері, Джиу-джитсу федерациясы, тағы басқа спорт түрлерінің дамуына үлес қосып келеді.
Мұның барлығы жай ғана қайырымдылық шарасы емес, басқаларға көмектесу бұл компанияның нағыз өмірлік кредосы іспеттес.
Сонымен қатар, Qazaq Oil мәдени шараларды қолдауға да ат салысады. 9 және 21 желтоқсанда астаналықтар атақты “Джулия” мюзиклін Astana Ballet сахнасында тамашалады. Бұл компанияның елорда тұрғындарына арналған сыйлығы десек болады.
Ал компанияның өзі ішкі қызметіне қатаң тәртіппен қарайды. Әр клиент сапалы жанармай пайдалана алады. (Жүргізілген тексерулерге сәйкес кездейсоқ станциялардан алынған жанармай сапасы заң шеңберінде орнатылған нормативтен де артық болып шықты)
Сондай ақ, станция қызметкерлері клиенттерге сыпайы, кәсіби түрде қызмет көрсетеді.
