Бұл туралы компанияның баспасөз қызметі хабарлады
Qazaq Oil Абай облысында өрттен зардап шеккендерге көмек ретінде 50 млн теңге бөлді, деп хабарлайды inbusiness.kz.
"Qazaq Oil ұжымы өрттің қасіретін тартқан әрбір отбасыға шын жүректен көңіл айтып, қолдау көрсетеді. Біз сіздерге түскен ауыртпалықты сезініп отырмыз. Өйткені, мұның барлығы біздің туған жеріміз Қазақстанда болып жатыр", - делінген Qazaq Oil мәлімдемесінде.
Компания Абай облысының тұрғындарына батылдық пен шыдамдылық тіледі.
"Моральдық қолдаумен бірге біздің компания орман өртінен зардап шеккендерге көмек ретінде 50 млн теңге көлемінде материалдық көмек бөлу туралы шешім қабылдады", - деп толықтырды Qazaq Oil.
Компания жақын арада жағдай тұрақталып, Абай облысының тұрғындары күнделікті өмірлеріне қайта оралатынына сенімді.
"Сіздер жалғыз емессіздер және мұндай қиын сәтте біз қастарыңыздан табылып, қолдау көрсетуге дайынбыз. Бұл қиындықтарды бірге жеңіп, күнделікті қалыпты өмірімізге қайта ораламыз. Халқымызға бейбітшілік, жақсылық пен амандық тілейміз", - делінген Qazaq Oil хабарламасында.
Фото: Ақорданың баспасөз қызметі
