Тұрғындар компанияға іздеу жариялады
Мектеп құрылысын бастаған мердігер бес айдан бері ізім-ғайым жоқ. Салдарынан мыңға жуық бала қаңғып қалды дейді ата-ана, деп хабарлайды Информбюро 31.
Ал жергілікті билік төбе көрсетпей кеткен компания басшысын сотқа берген. Өйткені бөлінген қаржыны кімнен қайтарарын білмей дал. “Екі ортада оқушылардың обалына қалдық” дейді жұрт.
Осы жылдың жазында құрылысы басталған оқу орны оқу жылының ортасында ойраны шығып жатыр. Басталған іс орта жолда тасталған. Бес айдан бері мұнда тұяқ серпілген тірлік жоқ.
№15 мектеп-гимназиясы жанынан 300 орындық қосымша ғимарат салу үшін қыруар ақша бөлінді дейді жұрт. Анығы, әкімшілік әмиянынан 2 млрд 500 млн теңгеге мемлекеттік сатып алу шартымен мердігер табылады. Білім ошағы құрылысқа жабылады. Сол жабылғаннан әлі күнге дейін қаңырап қалады. Сұрауын сұраған ел алапат құрылыс болса бір сәрі, қосымша құрылыстың аяғына жеткізбеген жергілікті билікке өкпелі.
- Балаларға обал болды. Ең бірінші білім сапасы. Білім сапасы төмендеп кетті қазір. 11-ді бітіретін балалар келесі жылы ҰБТ-ны қалай тапсыратынын ешкім білмейді. Ешкім жауап бермейді. Жауап бергісі де жоқ қазір. Жамбыл облысына бұл ұят нәрсе. Қосымша құрылыс 300 орындық. Соны тоқтатып қою дегенді айта алмаймын, - дейді Тараз қаласының тұрғыны Мұхтар СЕНБЕКОВ.
Қазір мұндағы балалар қаладағы үш мектепке жіберілген. Бұл қолайсыздық ата-аналардың ашуын тудырған. Басқа білім ошағында үш ауысымда оқыту білім сапасына кері әсер тигізетінін айтады. Биліктен бақылаудың борпылдақ болуынан, бұқара зардап шекті дейді.
- Біз балалар үшін шырылдаймыз. Балалар үш ауысымда үш мектепте оқып жатқаны біздің жанымызға батып тұр. Бір үйден үш мектепке таситын 5 балалы ата-аналар бар арамызда, - дейді Тараз қаласының тұрғыны Жәмилә ДОМБАЕВА.
Тапсырыс беруші құрылыс басқармасы бұл тек біздегі жағдай емес дейді. Ел бойынша дәл осы компания 40-қа жуық нысанды жарты жолда тастағанын айтады. Ендігі жаңа нысан тұрмақ, алдын ала берілген ақшамызды ала алмай отыр екен. Себебі, серіктестік банкрот болған.
- Бұл істің нақты қашан бітерін ешкім айта алмайды. Қазір келісім-шартты бұзуға, аванстық сумманы қайтаруға сотқа бердік. Бірақ алғашқы отырысқа компаниядан ешкім келген жоқ. Сондай-ақ біз жобаға түзету енгіздік. Соған сай келісім-шарттағы суммадан 700 млнға қысқартқанымызды айта кету керек, - дейді Жамбыл облыстық құрылыс басқармасының басшысы Ерлан ОРЫМБАЕВ.
Осылайша мұндағы мыңға жуық баланың жағдайы бүгін ертең бітер түрі жоқ. Тығырықтан шығудың жалғыз жолы келесі жылы конкурсты қайта ойнату дейді шенеуніктер. Бірақ соттың қашан аяқталары белгісіз. Ал, мердігермен байланысу біз тұрмақ, әкімдіктің өзіне мұң болып тұр.
Фото: Информбюро 31.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
