Ауладан жылан шықса бірден 112 нөміріне хабарласу қажет
Жыл басынан бері шымкенттік құтқарушылар жылан шықты деген қоңыраумен 25 мәрте шақыртуға барған, деп жазады ҚазАқпарат.
Бұл көрсеткіш өткен жылдың сәйкес кезеңімен салыстырғанда 9-ға көп. Яғни, былтыр осы аралықта құтқарушылар 16 рет жылан ұстауға шақырту алған.
Шымкент қаласы төтенше жағдайлар департаментінің мамандары тұрғындарға жыланды көрген кезде алшақ болуға, өз бетінше ұстамауға кеңес береді.
- Егер 112 қызметіне тұрғын үйлерге немесе шаруашылық құрылыстарына жыландар кіріп кеткені туралы, әрі бұл адамдардың өміріне қауіп төндіретіні жөнінде хабарлама келіп түссе, құтқарушылар бірден көмекке шығады. Олар жыландарды ұстап, қауіпсіз жерге шығарады. Біз үшін барлық жыландар улы болып есептеледі. Олардың адам өміріне қаншалықты қауіпті екенін тиісті мамандар анықтауы тиіс. Айта кету керек, жыландардың таралуының алдын алу құтқарушылардың жауапкершілігіне кірмейді, - делінген ведомство ақпаратында.
Ал, табиғат қорғаушы, “Сырдария-Түркістан” мемлекеттік өңірлік табиғи паркінің ғылыми қызметкері Ғани НАЗАРБЕК мамыр айында жылдандардың белсенділігі артатынын жеткізді.
- Шымкент аумағы жылдан жылға ұлғайып жатыр. Бұрынғы егістік алқабы болған далалық жерлерге қазір тұрғын үйлер салынды. Жаңа мөлтекаудандар бой көтеріп жатыр. Бәлкім, бұрын онда жыландардың ұясы болған шығар. Сондай-ақ, қазір жыландардың белсенділігі артатын кезең. Күндіз ары-бері жылжып, қоректенеді. Сондықтан бұл қалыпты жағдай деп қабылдау қажет, - дейді Ғани Назарбек.
Фото: Шымкент ТЖД.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
