Заңның мақсаты – жер қойнауын пайдалану саласындағы заңнаманы жетілдіру
Бүгін сенаттың жалпы отырысында “Қазақстан Республикасының кейбір заңнамалық актілеріне жер қойнауын пайдалану және экология мәселелері бойынша өзгерістер мен толықтырулар енгізу туралы” заңы бірінші оқылымда мақұлданды, деп хабарлайды Kazinform.
Заңның мақсаты – жер қойнауын пайдалану саласындағы заңнаманы жетілдіру.
Сенаттың Экономикалық саясат, инновациялық даму және кәсіпкерлік комитетінің мәліметінше, бұл құжатта көмірсутектерді геологиялық барлаудың инвестициялық тартымдылығын арттыру, базалық жобалау құжаттарына мемлекеттік сараптама жүргізу тәртібін жетілдіру ескерілген. Сонымен қатар заң аясында жер қойнауын пайдалану жөніндегі операцияларды жүргізу кезінде әкімшілік шығындарды қысқарту жөніндегі түзетулер, қолданыстағы олқылықтарды жою және келісімшартты ұзарту, жер қойнауы учаскесін кеңейту рәсімдерін жақсарту қарастырылған.
Атап айтқанда, құжатта сарқылатын кен орындарына инвестиция тартуды ынталандыру қадамдары қамтылған.
Заңда Жер қойнауы және жер қойнауын пайдалану туралы кодекске мынадай түзетулер ескерілген:
- барлау кезеңіндегі жобалау құжаттары үшін хабарлама жасау тәртібі қарастырылған, бұл базалық жобалау құжаттарына мемлекеттік сараптама мерзімін 6 айға дейін қысқартуға мүмкіндік береді.
- базалық жобалау құжаттарын сараптау тәртібін қайта қарау, бұл келісу кезеңін 8 айға қысқартады.
- көмірсутектер саласындағы аукциондық рәсімдерді жетілдіру, бұл электрондық аукциондарды өткізу кезінде бәсекелестікті күшейтуге мүмкіндік береді.
- барлау кезеңін ұзартуға қосымша мүмкіндік береді. Бұл барланған жер қойнауы учаскелерін өнеркәсіптік айналымға тарту мерзімін 3 жылға дейін қысқартуға ықпал етеді.
- барлау кезеңін ұзарту туралы өтініш беру мерзімі созылады, бұл барлау жұмыстарын, оның ішінде табылған кен орнын бағалау бойынша жұмыстарды жалғастыруға мүмкіндік береді.
- таусылатын кен орындарында өндіруді қолдау және басқалар.
“Бұдан басқа, Экологиялық кодекске Ұлттық пошта операторында жер қойнауын пайдалану салдарын жою үшін ақшаны сақтау мүмкіндігі бөлігінде түзетулер енгізіледі. Бұл мемлекет пен жер қойнауын пайдаланушы үшін екінші деңгейдегі банктің дефолтынан немесе таратылуынан банктік салымның жоғалту қаупін азайтады, сондай-ақ ұлттық компанияның кірістілігін арттыруға мүмкіндік береді”, - делінген сенат комитетінің ақпаратында.
Фото: Сенаттың баспасөз қызметі.
