Алаяқтарға алданып қалмаңыз
Асеке – ойдан шығарылған адам дегенмен, оның басына туған күн сіз бен бізге де келіп тұрмасын.
Асекең кеше ғана мерейтойын тойлатқан. Тойына кісі көп келді, жасаған тойы өзін артығымен ақтады. Асекеңде ақша көп, күніне бірнеше рет телефонын ашып, картасындағы мол ақшаға мәз болады.
Ол ақшаны жұмсайтын ойы жоқ, жата берсін деп шешкен. Әйелі ғана "ақша орнында тұр ма, үйді жөндейміз, қақпа ауыстырамыз, кенже ұлға үйге жинаймыз" деп күнде маза бермей жүрген.
Сөйтіп жүргенде телефонына сыңғыр етіп бұған хат келмей ме. Жазып тұрған адамның түрі таныс сияқты. Аты-жөніне қараса – біздің премьер-министрдің өзі! Асекеңнен көмек сұрап тұр!
Асекең оның ақша сұраған қолын қалай қайтармақ. Бас салып сұраған ақшасын аударып жіберді. Қиналып тұрғанда ақша бергенін премьер-министрдей азамат ұмыта қоймас. Кейін оның да көмегі тиеді. Ертең БЕКТЕНОВПЕН бір дастарханда бірге отыратынын ойлап кетті.
Кешке әйелі ақша жайында тағы сұрады.
- Ақша жоқ, мен оны Олжекеңе қарызға бердім.
- Қайдағы Олжеке?
- Ей, қараңғы, біздің премьер-министрімізді білмейсің бе? - деген Асеке.
Әйелі бәрін бірден ұғып, еңкілдеп жылай жөнелді.
Асекең үлкен шенеуніктің атын жамылған алаяқтарға сеніп қалған ғой. Бүкіл ақшасын соларға бере салған.
НАЗАР АУДАРЫҢЫЗДАР! Үкіметтің баспасөз қызметі мессенджерлерде премьер-министр мен үкімет мүшелерінің атынан ақша сұрайтындар пайда болғанын хабарлайды.
Бұл – жалған! Мұны интернет-алаяқтар істеп жатыр.
Жалған ақпаратқа сенбеңіздер, ақша аудармаңыздар және күмәнді сілтемелерге өтпеңіздер. Құқық қорғау органдары алаяқтық әрекеттерді жасаған тұлғаларды анықтау және жауапкершілікке тарту бойынша жұмыс жүргізіп жатыр.
Фото: Ақорданың баспасөз қызметі.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
