Елдің тағдырын қыл үстіне қоюға ешкімнің қақысы жоқ
Президент ТОҚАЕВ былтырғы жолдауында: "АЭС құрылысы бүкіл халықтық референдумсыз шешілмейді, уәдемде тұрамын", - деді.
Бәлкім, референдумнан бұрын, бүкіл қоғам болып, айтулы мамандар болып, әбден талқылауымыз керек пе еді?
Биліктің қазіргі әрекеттері халықтан бұрын өздері шешім шығарып қойғанға меңзейді. Халық қанша қарсы болса да, референдум нәтижесіне әсер ете алмауы мүмкін. Біздің елде сайлау қалай өтетіні, дауыс қалай саналатыны бәрімізге белгілі.
Халықтың сайлау, референдум атаулыға соншалықты самарқау қарайтынының басты себебі – олардың биліктен көңілінің қалуы. Көңілі қалмай қайтеді? Қазақ елінің сайлау жүйесі, оның кемшіліктері 32 жыл бойы айтылып келеді. Нәтиже жоқ. Бұрынғы сайлау жүйесі, бұрынғы заң, бұрынғы тәсілдер, бұрынғы нәтижеге қол жеткізу.
АЭС – референдум арқылы шешілгелі отырған үлкен мәселе. Билік оны өтірікке құрылған ескі жүйенің жолымен емес, халықпен санаса отырып, тиімді жолмен шешуі тиіс. Билік тактикалық міндеттерді жүзеге асыру үшін ғана халықтың тағдырын қыл үстіне қоюға қақысы жоқ. Сондықтан да халық әділдікті қалайды. Референдумның әділ өткенін, таңдау жасауда халыққа еркіндік пен ерік бергенін қалайды. Бұл – миллиондаған халықтың үміті мен сенімі. Билік – халық сеніміне ие болу, халыққа сүйеніп билік жүргізу. Конституция бойынша биліктің жалғыз қайнар көзі – халық, президент болсын, әкім, министр болсын, уақытша менеджер ғана. Ол халықтың қызметшісі болуы тиіс.
Референдумның талаптары өкіметтегі бір топ емес, бүкіл ел үшін орындалуы керек.
Олай болса, өзіңді сыйла, өзіңді сыйлаған халықты сыйла, сол халықтың үніне құлақ түр!
Мұрат Өтебайұлы, Саудакент ауылы, Сарысу ауданы Жамбыл облысы.
Фото: © Ratel.kz / Сергей Перхальский.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
