Еттің қымбаттағанының көкесі енді болайын деп тұр
Ауыл шаруашылығы министрлігінен мына хат келгелі мал шаруашылығымен айналысып отырған азаматтардан маза қашты. Онда "әлеуметтік маңызы бар тауарларға арналған субсидияларды, яғни бұқашықтарды бордақылау, тағамдық жұмыртқа, қозы еті, жүн, бие, түйе сүтін алып тастау жоспарлануда" делінген. Бұл ұсыныс хат ретінде келген. Бірақ, сөздің шыны керек, орындалуы талап етіліп отыр.
– Амал жоқ, орындадық, - деді Қызылорда облыстық ауыл шаруашылығы басқармасының бөлім басшысы Арыстанбек ОМАРОВ.
Былтыр жыл аяғында осы мәселенің шеті шыққан-ды. Сол сәттен-ақ сырбойылық шаруашылық иелері қарсылығын білдіріп, әкімдікке келген-ді.
Соған сәйкес, облыс әкімінің орынбасары жағдайды баяндап, Ауыл шаруашылығы министрілігіне хат та жолдаған-ды. Алайда ведомство айтқан бетінен қайтпайтынын ашық білдірді. Осылайша ақпанның 5-інен бастап жергілікті әкімдік мал борадақылау, тағамдық жұмыртқа мен түйе, бие сүтіне субсидия бөлінбейтіні туралы қаулы қабылдауға мәжбүр болды.
Облыста жалпы мал шаруашылығы бойынша 1200 шаруашылық субсидия алады. Оның ішінде мал бордақылаумен 3 шаруашылық айналысады. Соның ең ірісі – "Сыр маржаны" ЖШС. Былтыр бұл шаруашылық 45 млн теңге субсидия алды.
Осы санатта Қызылорда облысы Жаңақорған ауданы Қыркеңсе ауылының "Бекарыс агрофуд" шаруашылығының төрағасы, жас кәсіпкер Серік МЫРЗАБАЕВ та биыл субсидиядан үмітті еді. 80 миллион теңгедей қаражат жұмсап, бүкіл инфрақұрылымын жасақтап (жолын, жарығын, суын), техникасын, жем-шөбін даярлап, мал сою алаңын салып, 600-ден астам бұқашықты бордақылап, шаруашылықтың ісін ілгерілеткен сәтте, "биылдан бастап бұл мақсатқа субсидия бөлінбейді" деген ережені естіп, есеңгіреп қалды. Осы кәсіпті бастасам ба деп жүргендер мына жаңалықтан кейін тіпті шегіншектеп кетті.
Біз аталған жәйтқа қатысты облыстық кәсіпкерлер палатасы нендей мәлімет біледі екен деген оймен жауапты өкілдеріне жолыққан едік. Жергілікті палата шаруалар үшін жағымсыз жаңалықтан хабардар. Әкімдік, ауыл шаруашылығы басқармасы, ұлттық кәсіпкерлік палатасымен де пікірлесіп үлгеріпті.
- Ауыл шаруашылығы министрлігі заңды түрде әлі күшін жоймаған ереженің кей бағыттарын ешқандай да заңды құжат шығармай алып тастап отыр, - деді бізге берген сұхбатында облыстық кәсіпкерлік палатасы агроөнеркәсіптік кешені бөлімінің басшысы Жасұлан СЕРІКОВ. – Министрліктің позициясын телефон арқылы білдік. Ведомство облыстық әкімдіктерге аталған бағыттарға қаралған субсидияны қолданыста бар ережеден алып тастауға ұсыныс беріп отыр.
Бөлім басшысы Ж.Серіков кәсіпкерлер палатасы бұл шешімге қарсы екендігін білдірді. Облыстық бюджетте дәл осы мақсатқа қаралған 60 млн теңге қаражат бар екен. Ауыл шаруашылығы министрлігі ресми түрде аталған бағыттарға субсидия бөлуді тоқтатса, әлгі қаражат кері қайтарылады, болмаса басқа бағытқа жұмсалуы да мүмкін деген пікірді ол.
- Қаражат кері қайтарлмайды, басқа салаға бағытталады, мәселен, омарташылыққа, яки бал арасын өсірумен айналысатындарға берілуі әбден мүмкін, - деді Қызылорда облыстық ауыл шаруашылығы басқармасының бөлім басшысы Арыстанбек Омаров.
Айтпақшы,жоғарыда аталған "Сыр маржаны" ЖШС облыста 3-4 жерден әлеуметтік дүкен ашып, еттібазар бағамынан 15-20 пайыз төмен бағамен сатып келген-ді. Енді субсидия тоқтады, бұл шаруашылық әлгі әлеуметтік дүкендерін жабуы әбден мүмкін.
Фото: © Sputnik / Александр Кондратюк.
