Алтыншы баспананы алты балалы отбасыға тарту етті
Әбіш Кекілбаев ағамыз сияқты сөз сабақтасақ, арамызда әлсізге медет, зарыққанға жебеу, тарыққанға демеу, сасқанға сая боп жүретін ат төбеліндей азаматтар бар. Олар пейіл кеңейтіп, мерей өсірер, тілек қосар қайырлы шараларға жұмылуды әдет еткен. Сондай жанның бірі – қызылордалық Сәбит СҰЛТАН.
Осыдан 6 жыл бұрын екі қолдағы саусақтың санындай жігіттер бас қосып, қайырымдылықпен айналысуды мақсат етті. Шекелері шылқығаннан емес, жер басып жүрген тірі шағында жетім-жесірді жебеп, жылағанды жұбату деген адами миссияны атқару үшін. Ас ішіп, аяқ босатып, күн өткізу үшін емес, жас ұрпаққа үлгі болар істі жасау үшін. Осы уақытқа дейін Сәбит және оның командасы 5 баспананы мұқтаж жандарға тарту етіп, еңкейгеннің еңсесін тіктетті, тірліктерін түзетті. Бұл туралы Ratel.kz жазған да болатын. Міне, және бір баспана өз иесін күтіп тұр. Кейіпкер кім десек.
Қызылоралық Бота ПАНОВА 6 баланың анасы. Тұңғышы әскери борышын өтеуде. Қазір қолында 5 баласы бар. Апатты деп танылған қоржын үйдің бір бөлмесін паналап отыр. Осы күніне де шүкір етеді. Өйткені далада қонған кездері аз емес. Үйі де, күйі де жоқ келіншектің күйеуі де жоқтың есебінде. Аман құтылғанына шүкір айтады. Қорғансыздың күнін кешіп жүрген байғұс ананың балалары да тұрмыстың тауқыметін титтейінен көріп келеді. Бірақ, бір таң қалдырғаны – бұл отбасы мүлдем мойымайды. Жігері мықты. Құдайдан күдерін үзбей, тіршілік үшін тырбанып келеді. Шиттей бала-шағаны бағу үшін Бота тігін шеберханасын жалға алып, күнделікті нанын тауып жүр.
Таңда тұра сала тірлікке асығатын Бота өзін қандай тосынсый күтіп тұрғанын білмейтін еді. Бір жұмыс тапсырғалы тұр деп ойлап келген келіншек қолына кілтті ұстатып, “осы баспана енді өзіңдікі!” дегенде, қапелімде не істерін білмей қалды. Қазақ қуанған мен қорыққан бірдей деп бекер айтпаса керек
Игі істің басы-қасында жүретін Сәбит тым қарапайым. Артық сөзге жоқ. Жұмыстан қашпайды. Келіншегі екеуі кешке қосымша тірлік жасап, тиынды тиынға қосып, осындай қайырлы іске бағыттап, содан ләззат алады. Кейбіреулер өмірдің ләззатын іздеп, кафе, сауна жағаласа, Сәбиттің отбасы мен достары титімдей болса да осындай мейірімге толы көрініс үшін бар күш-жігерін паш етуге әзір.
Сәбит және оның командасының алдағы жоспары да ауқымды. Үлкен үй тұрғызып, оны бірнеше пәтерге бөліп, шын мұқтаждарға қоныстой жасағысы келеді. Өзі аз халқымыз әркімнің бұрышын паналамай, өз шаңырағында бала-шағасымен бақытта өмір сүргенін қалайды. Тірлік етуге құлшынған, жақсылыққа ұмтылған осындай азаматтарды көргенде ертеңге деген сенімің беки түседі.
Фото: © Ratel.kz / Айнұр Тұңғышбаева.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
