Қазіргі таңда мемлекет басшысының тапсырмасын орындау аясында тұрғын үй төлемін берудің тәсілдері мен тетіктері қайта қаралып жатыр
Үкімет басшысы Әлихан Смайылов Сенат депутаттарының сауалына берген жауабында құтқарушыларға тұрғын үй төлемін беру мәселесін арнайы жұмыс тобы пысықтап жатқанын айтты, деп хабарлайды ҚазАқпарат.
"Құтқарушыларға тұрғын үй төлемін ұсыну мәселесіне келсек, қолданыстағы заңнама бойынша тұрғын үй төлемін арнайы мемлекеттік органдардың, ішкі істер органдарының (тізбедегі жекелеген санаттағы қызметшілер) жемқорлыққа қарсы іс-қимыл жөніндегі уәкілетті органның жедел тергеу бөлімшелерінің қызметшілері және әскерилер, осы санаттағылардың отбасы мүшелері алады. Қазіргі таңда мемлекет басшысының тапсырмасын орындау аясында тұрғын үй төлемін берудің тәсілдері мен тетіктері қайта қаралып жатыр", - дейді Әлихан Смайылов.
Оның сөзінше, премьер-министрдің орынбасары - Қаржы министрі Ерұлан Жамаубаевтың басшылығымен тиісті жұмыс тобы құрылған.
"Осы жұмыс тобының аясында тұрғын үй заңнамасын жетілдіріп, аталмыш мақсатқа жұмсалатын бюджет шығындарын оңтайландыруға, бөлінген қаражатты мақсаттан тыс пайдалануды болдырмауға бағытталған бірқатар ұсыныс әзірленді. Пысықталған тәсілдерді іске асыру нәтижесінде тұрғын үй төлемін алатын санаттардың тізбесін кеңейту мәселесі қаралады. Оның ішінде азаматтық қорғаныс қызметкерлері де бар", - делінген Үкімет басшысының жауабында.
Фото: Ⓒ Ratel.kz / Сергей Перхальский.
