Солтүстік Қазақстан облысында ауыл мектептеріне 29 жаңа автобус тапсырылды
Солтүстік Қазақстан облысында ауыл мектептеріне 29 жаңа автобус тапсырылды. Оқушыларды қауіпсіз тасуға арнайы жарақтандырылған көлік мүмкіндігі шектеулі балаларға да ыңғайлы болмақ, деп хабарлайды ҚазАқпарат тілшісі.
СҚО мектептерінің автопаркі бүгін 29 автобуспен толықты. Облыс әкімі Айдарбек Сапаров жаңа автобустардың кілтін табыс етіп, жиналған қауымды қуанышты сәтпен құттықтады.
"Елімізде білім саласына әрқашанда көп көңіл бөлініп келеді. Мемлекеттің қолдауының арқасында өңірде білім жүйесін дамытуға қомақты қаржы бағытталған. Біз балалар қауіпсіздігін нығайтуға ерекше мән беріп отырмыз.
Бүгін ауыл мектептеріне жаңа 29 автобустың кілтін табыс етеміз. Жаңа автобустар оқушылар үшін ыңғайлы әрі қауіпсіз болады. Барлығы ауыл мектептеріне беріледі. Бұл жұмысты біз одан әрі жалғастырамыз", - деді Айдарбек Сапаров.
Мектеп автобустары қауіпсіздік белдіктерімен, есіктері ашық кезде қозғалысты тежейтін механизммен, ауа баптағыштармен жабдықталған. Мүмкіндігі шектеулі балалар үшін пандус және жүргізушіні шақыратын түйме орнатылған.
"Қазір СҚО-ның ауыл мектептерінде 143 автобус бар. Автопаркті жаңарту бойынша жұмыс әлі де жалғасады. Балалардың қауіпсіздігі, сапалы білім алуы үнемі назарда, салаға қомақты сома бөлініп жатыр.
Мемлекет басшысының тапсырмасына орай "Жайлы мектеп" ұлттық жобасы аясында Петропавлда 4 заманауи мектеп салынады. "Береке" шағын ауданында коррекциялық мектеп-интернат құрылысы басталады", - деді СҚО әкімі.
Өңір басшысының айтуынша, биыл 49 мектепті күрделі жөндеуге 4,3 млрд теңге бөлінді. 2,8 млрд теңге білім ордаларының материалдық-техникалық базасын нығайтуға жұмсалды. Оның ішінде білім беру ұйымдарын мамандандырылған күзетпен қамту да бар.
СҚО-да 1-4 сынып оқушыларын тегін тамақпен қамтуға 1 млрд теңге бөлінді.
Мектепке дейінгі білім беру ұйымдарына деген қажеттілікті жабу үшін жақында "Жас өркен" және "Береке" шағынаудандарында 2 балабақша құрылысы басталмақ.
Фото: mtrk.kz.
