Он айдың ішінде қылмыс жасаған 32 бала анықталды
Солтүстік Қазақстан облысында өткен он айдың ішінде жасөспірімдер 32 қылмыс жасаған. 2,5 мыңға жуық ата-ана балаларының түнгі уақытта көшеде жүруіне байланысты әкімшілік жауапкершілікке тартылды, деп хабарлайды Kazinform.
СҚО Полиция департаментінің бастығы Айдын Қабдұлдиновтың айтуынша, жергілікті полиция қызметі жұмысының маңызды бағытының бірі – жасөспірімдер қылмысының алдын алу, балаларды қараусыз және қадағалаусыз қалдыруға жол бермеу және оларға қатысты жасалған қылмыстарды анықтау.
"Алдын алу шараларының нәтижесінде кәмелет жасына толмағандарға қатысты жасалатын қылмыс 55-тен 53-ке дейін кеміді, сондай-ақ балаларға қатысты жыныстық зорлық-зомбылық 20,6% азайды, былтыр 29 факті тіркелсе, биыл 23 бала зардап шекті", - дейді Айдын Қабдұлдинов.
Он айдың ішінде қылмыс жасаған 32 бала анықталды. Заң бұзушылықтарға жол бермеу үшін үнемі рейдтер жүргізіліп тұрады.
"Жыл басынан бері кәмелет жасына толмағандардың 2 359 заңды өкілі балалардың түнде үйден тыс жерде жүргені үшін жазаланды. Көңіл көтеру орындарының 23 иесі балаларды кіргізгені үшін айыппұл төледі. Дүкендердің 49 иесі 21 жысқа толмағандарға темекі сатқаны үшін әкімшілік жауапкершілікке тартылды. 727 ата-ана балаларын тәрбиелеуде міндеттерін орындамағаны үшін жазаланды", - дейді Айдын Қабдұлдинов.
Биыл 32 жасөспірім және 110 отбасы полицейлердің есебіне алынды. Девиантты мінез-қылығы үшін жасөспірімдердің алтауы арнайы мектепке жіберілді.
Фото: polisia.kz.
