Халық мобильді байланыстың нашарлығына жиі шағынданады
Жетісу облысы Кербұлақ ауданының тұрғындары әлеуметтік желілер мен жергілікті белсенді Мұратбек СОЛТАНБАЙДЫҢ парақшасында екі ұялы байланыс операторының атына ұжымдық өтініш жариялады. Олар шағымында байланыстың жиі үзілетіні мен сапасының төмендігін айтады.
- Құрметті Beeline және Tele2 компанияларының өкілдері! Сіздерге Сарыөзек ауылының тұрғындары атынан ресми шағым жолдап отырмыз. Көрсетілетін байланыс қызметтерінің сапасы өте төмен.
Тарифтік жоспарлардың жоғары құнына қарамастан (ең төменгі абоненттік төлем 5900 теңге), байланыс сапасы сын көтермейді. Дауыстық байланыс тұрақсыз, қоңыраулар жиі үзіліп кетеді, ауылдың кейбір аудандарында мүлдем байланыс жоқ. Интернет жылдамдығы өте төмен, 3G/4G қамту ресми түрде бар болғанымен, деректерді беру жылдамдығы өте баяу, бұл қарапайым онлайн қызметтерді пайдалануға мүмкіндік бермейді. Байланыс тұрақсыз, әсіресе кешкі уақытта жиі үзіледі. Бұл жағдай тұрғындар арасында жаппай наразылық тудыруда. Біз, абоненттер, жоғары тарифтерді төлей отырып, байланыс сапасының жарияланған стандарттарға сай болуын күтеміз.
Біз Сарыөзек ауылындағы желілік инфрақұрылымға аудит жүргізіп, техникалық ақауларды жоюды талап етеміз. Байланыс қамту аймағын кеңейтіп, базалық станциялардың қуатын арттыру қажет. Мәселе толық шешілгенге дейін тариф бағасын төмендету мүмкіндігін қарастыруды сұраймыз, өйткені қазіргі бағалар көрсетілетін қызмет сапасына сай емес. Байланысты жақсарту бойынша жұмыс жоспары көрсетілген ресми жауапты 10 жұмыс күні ішінде берулеріңізді сұраймыз. Егер ешқандай шара қабылданбаса, тұрғындар ҚР Тұтынушылар құқығын қорғау комитетіне, Ақпараттандыру және байланыс агенттігіне жүгінуге мәжбүр болады, - делінген Кербұлақ ауданы тұрғындарының шағымында.
Шағымданушылардың айтуынша, олар диалогқа ашық және байланыс операторларының өкілдері мен жергілікті әкімдік өкілдерінің кездесуін ұйымдастыруға дайын. Ауыл тұрғындарының өтініші астында байланыс операторларының бірінің пікірі пайда болды. Олар шағымдарды жеке жолдауды сұрап, әрбір өтінішті жеке қарастыруға дайын екенін мәлімдеді.
Айта кетейік, бұған дейін Кербұлақ ауданының Беріктас ауылының тұрғындары өз қаражатына ұялы байланыс мұнарасын орнатқан болатын, алайда оны заңдастыра алмаған. Осы ауданға қарасты Шаған ауылының студенттері 2020 жылы коронавирус пандемиясы кезінде онлайн сабақтарға қосылу үшін тауға шығып, интернет ұстауға мәжбүр болған.
Фото: © Ratel.kz / Алия Ахмедиева.
Аударған А.Олжаев.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
