Қиын жағдайда қалғандарға көмектесу Qazaq Oil-дың игі дәстүріне айналды
Азық-түлік салынған қораптар осымен алтыншы рет көмекке мұқтаж отбасыларға таратылды. "Игі істер марафоны" акциясын былтырғы жылдың басында Астана қаласының әкімдігі мен Qazaq Oil компаниясы қолға алған болатын. Содан бері ел астанасының мыңдаған тұрғындарына, оның ішінде жалғызбасты аналар, зейнеткерлер, мүгедектігі бар азаматтар, көпбалалы отбасылар мен асырауында ерекше күтімді қажет ететін балалары бар отбасыларға көмек көрсетілді.
Құрбан айт мерекесі күні қолдауға зәру шаңырақтарға тағы 1000 азық-түлік қорабы жеткізілді.
"Астана Жастары" бірлестігінің еріктілері азық-түлікті қораптаға салып, оны көліктерге тиеді, жүргізушілерге жөн сілтеп, әрбір үйге азық-түлікті табыстады. Әр қорапқа жалпы салмағы 40 келіден астам азық-түлік салынған – дақылдар, ұн, қант, сұйық май және басқа да әлеуметтік маңызды тауарлар.
Qazaq Oil бас директоры Төлеміс ШОТАНОВ мұндай әлеуметтік бастамалардың маңызын атап өтті: "қиын өмірлік жағдайда отырған өз еліміздегі жандарға қолдау көрсетудің қаншалықты маңызды екенін біз түсінеміз. Бизнестің міндеті тек қаржылық табысқа кенелу емес, отандық бизнес елдегі әлеуметтік бастамаларға да белсене араласып, халыққа көмегін тигізуі тиіс деп санаймыз. Бұл шара біздің компаниямыздың әділетті және қайырымды қоғам жолындағы көптеген шараларының бірі ғана".
"Осындай қолдау көрсеткені үшін Qazaq Oil компаниясына, қала әкімдігіне, осы шараға қатысқан барша қауымға деген алғысым шексіз. Біз жыл сайын көмек түрінде неше-түрлі азық-түлік алып отырамыз. Барша қазақстандықтарды бүгінгі мейраммен құттықтаймын! Әрбір отбасыға зор денсаулық тілеймін, аспанымыз ашық, заманымыз тыныш болсын”, - деді азық-түлік қорабын алған кезде көпбалалы ана Жаңагүл ҚАРАСАЕВА.
Qazaq Oil – еліміздегі түрлі спорттық, мәдени және қайырымдылық шараларға тұрақты қолдау көрсетіп келе жатқан компания. Былтыр бұл компанияның Абай және Қостанай облыстарында өрттен зардап шеккендерге көмек ретінде қомақты қаражат бөлгені бар. ҚР Үстел теннисі федерациясымен бірлесіп "Qazaq Oil-дан 100 ауылға 100 үстел теннисі залы" жобасы жүзеге сәтті асырылды.
Биыл компания су тасқынынан зардап шеккендерге көмекке және еліміздің бірқатар өңірлерінде орын алған табиғи апаттар салдарын жоюға 150 миллион теңге бөлді.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
