С.Торайғыров атындағы облыстық кітапханада аталған фестивальдің ашылу салтанаты өтті
Ол еліміз бойынша тұңғыш рет ұйымдастырылып отырған шара, деп хабарлайды @Pavlodarnews.kz тілшісі.
С.Торайғыров атындағы облыстық кітапханада аталған фестивальдің ашылу салтанаты өтті. Бұдан соң кітапсүйер қауым түрлі форматта ұйымдастырылған әдеби-мәдени шараларға қатысты. Атап айтсақ, "Облыстық кітапхана – бірінші курс студенттеріне" атты кітап көрмесі ашылды. Көрмені тамашалаған алғашқы курстың студенттері кітапхананың тыныс-тіршілігімен танысты.
- Бұл фестиваль биыл алғаш рет ұйымдастырылып отыр. Мақсат – кітапханаларға оқырман тарту. Жалынды жастардың кітапқа деген қызығушылығын арттыру. Көпшілік назарын ел бойынша бір сәтке кітапқа аудару. Қазіргі қоғам үшін бұл өте маңызды. Аталған фестивальді келер жылы бұдан да кең көлемде ұйымдастырамыз деп ойлаймын, - дейді С.Торайғыров атындағы кітапхана басшысы Шолпан Шахметова.
Сондай-ақ фестиваль аясында белгілі жыршы, Абайтанушы Даниял Әсенов жастармен кездесіп, Абайдың қара сөздерімен қатар Мағжанның маржан жырларын, Батыр Баян мен Қобланды батыр жырларынан үзінділерді жатқа оқып көпшілікті таң-тамаша етті.
Ал әлеуметтік желілерде өз белсенділігін арттырғысы келген жастар блогер Ирина Ковалеваның "Business community" жобасы аясында дәріс тыңдады.
Бұдан бөлек, "Жырласа жастар жырласын" тақырыбында өткен поэтикалық кешке қатысқан жас қаламгерлер әдеби әлемде өздерін толғандырып жүрген сауалдарын ортаға салып, пікір алмасса, "100 жаңа оқулық" кітап көрмесі Павлодар педагогикалық университетінің атсалысуымен өтті. Бұл көрме алдағы бір апта бойы оқырман назарына ұсынылатын болады.
Сонымен қатар бұл күні оқырмандарды кітап оқуға үгіттейтін ерекше форматтағы қызықты шара ұйымдастырылды. Бұл шараға үлкендер де жастар да қатысты.
Фото: Pavlodarnews.kz.
