Заң жобасында қару-жарақ пен әскери техниканы жөндеуді оңайлату және жеделдету мақсатында мемлекеттік сатып алу қаралады
Мәжіліс отырысында оқ-дәрілер мен жарылғыш заттарды кәдеге жарату, объектілердің өндірістік қызметін ұйымдастыру және қауіпсіздігін қамту функциясын Өнеркәсіп және құрылыс министрлігінің құзыретіне беру ұсынылды, деп хабарлайды ҚазАқпарат.
- Қорғаныс өнеркәсібі мен мемлекеттік қорғаныс тапсырысын реттейтін заң 2019 жылғы 18 наурызда қабылданды. Яғни, 4 жыл ғана өтті. Мәжілісте өткен іс-шаралар барысында бірқатар проблема анықталды. Осыған байланысты бір топ депутат қаралып отырған заң жобасына бастмашы болды.Біріншіден, Өнеркәсіп және құрылыс министрлігіне, оқ-дәрілер мен жарылғыш заттарды кәдеге жарату, объектілердің өндірістік қызметін ұйымдастыру және қауіпсіздігін қамту функциясын беру ұсынылады. Бұл құжат алдымен жарамдылық мерзімі өткен оқ-дәрілерді кәдеге жаратумен айналысатын “Қазтехнология” ұйымының қызметі үшін қажет, - деді мәжілістің халықаралық істер, қорғаныс және қауіпсіздік комитетінің төрағасы Айгүл ҚҰСПАН.
Халық қалаулысының айтуынша, заң жобасында қару-жарақ пен әскери техниканы жөндеуді оңайлату және жеделдету мақсатында мемлекеттік сатып алу қаралады.
- Ал орташа немесе күрделі жөндеу, қозғалтқыштар мен беріліс қораптар және тағы сол сияқты міндеттерді Өнеркәсіп және құрылыс министрлігінде қалдыру қажет деп санаймыз. Себебі аталған сұрақтар мұқият пысықтауды талап етеді. “Мемлекеттік қорғаныстық тапсырысы туралы” заңның қолданыстағы нормалары шарттың орындалу мерзімін өзгертуге мүмкіндік бермейді, - дейді ол.
Оның мәлімдеуінше, заңның қабылдануы қорғаныс-өнеркәсіп кешені қызметінің тиімділігін және еліміздің қорғаныс қабілетін арттыруға ықпал етеді.
Айта кетейік, қазір Мәжілісте “Қазақстан Республикасының кейбір заңнамалық актілеріне қорғаныс өнеркәсібі және мемлекеттік қорғаныстық тапсырыс мәселелері бойынша өзгерістер мен толықтырулар енгізу туралы” Қазақстан Республикасы Заңының жобасы қаралып жатыр.
Фото: ҚазАқпарат ХАА.
