Президент Қасым-Жомарт Тоқаев мемлекет медицина қызметкерлеріне жан-жақты көмек көрсететінін айтты
НҰР-СҰЛТАН, 21 маусым – Sputnik. Қазақстан президенті Қасым-Жомарт ТОҚАЕВ медицина қызметкерлерін кәсіби мерекесімен құттықтады.
"Еліміздегі барша медицина қызметкерін кәсіби мерекелерімен құттықтаймын! Ауырған жанды емдеу, өмірін сақтау – сіздердің қастерлі еңбектеріңіз", - деп жазды Тоқаев Twitter-де.
Мемлекет басшысы пандемиямен күрестің алдыңғы шебінде жүрген дәрігерлерге ризашылығын білдірді.
"Қажырлы еңбектеріңіз үшін алғыс айтамын. Аман болыңыздар! Мемлекет сіздерге жан-жақты көмек береді", - деді президент.
Денсаулық сақтау министрлігінің ақпаратынша, коронавирус эпидемиясы Қазақстанда тарағалы бері 1 904 медицина қызметкері індетке шалдыққан. Олардың тек 30 проценті ғана вирусты жұмыста жұқтырған.
Фото: akorda.kz.
