Бірақ өндірістің қауіпсіздігі қатаң бақылауға алынбақ
Шығыс Қазақстан облысы Күршім ауданы Маралды ауылындағы алтын өндіру фабрикасының жұмысы тоқтамайтын болды, деп хабарлайды Kazinform.
Күршім ауданы Маралды ауылының маңындағы алтын өндіру фабрикасының жұмысын тоқтатуға ешқандай негіз жоқ. Яғни, фабрика ары қарай да жұмыс істейді. Бірақ өндірістің қауіпсіздігі қатаң бақылауға алынбақ.
Бұл туралы ҚР экология және табиғи ресурстар вице-министрі Мансұр Ошурбаев, өнеркәсіп және құрылыс вице-министрі Иран Шархан және Шығыс Қазақстан облысы әкімінің бірінші орынбасары Нұрымбет Сақтағановтың Маралды ауылының тұрғындарымен кездесуі барысында айтылды.
"Вице-министрлер, ШҚО әкімінің бірінші орынбасары және облыстық басқарма басшыларынан құралған топ Маралды ауылына барып, салынып жатқан алтын өндіру фабрикасының жұмысымен танысты. Фабрика басшылығына егер тұрғындарға, қоршаған ортаға залал тиетін болса, экологиялық және қауіпсіздік талаптары орындалмаса, заң аясында қатаң шаралар қолданылатынын, тіпті зауыт жұмысы тоқтатылатыны қатаң ескертілді. Одан кейін топ жергілікті тұрғындармен кездесіп, олардың өтініш-талаптарын тыңдады. Нұрымбет Сақтағанов барлығы да заң аясында шешілуі керек екенін атап өтті. Заң бойынша ешқандай негіз болмағандықтан фабрика жұмысы тоқтамайды. Ең маңыздысы – халықтың жағдайы және заң. Сондықтан экологиялық жағдай қатаң бақылауда болады, ал заңсыз қазба жұмыстарын жүргізуге жол берілмейді", - деп хабарлады ШҚО ақпарат орталығынан.
Жиын соңында вице-министрлер алдағы уақытта маралдылықтармен тағы да кездесетінін мәлімдеді. Ал тұрғындар айтылған мәселелерге түсіністік танытты. Еске салсақ, осыған дейін Маралды ауылының тұрғындары алтын өндірісін ашуға қарсы шыққаны хабарланған. ШҚО әкімдігі алтын кенішінің даулы мәселесі заң шеңберінде ғана шешілуі тиістігін мәлімдеді.
Фото: ШҚО ақпарат орталығы
