Алаяқтарға алданып қалмаңыз
Асеке – ойдан шығарылған адам дегенмен, оның басына туған күн сіз бен бізге де келіп тұрмасын.
Асекең кенже ұлына күйініп отыр. Ол биыл оқуға түседі, гейм-дизайнердің оқуына барам дейді.
- Онысы несі, кеден ісі, не болмаса заңгер мамандығына неге бармайды? Адам ұқпайтын оқуды оқып, ертең бала-шағасын қалай асырамақ!, - деп Асеке басын шайқады.
Әйелі де үлкен ұлдарын мысал етудің орнына кенже баланың осы таңдауын жақтайды. Үлкен ұлдардың бірі полицей, екіншісі – теміржолшы, қызы – есепші. Бәрі өмірдегі орнын тапқан.
"Адам деген өз тағдырына жауапты қарауы керек қой-ей", деп күрсінді Асеке.
Сол кезде телефоны шыр етті. Арғы жақтан естілген қатқыл дауыс өзін Ұлттық қауіпсіздік комитетінің қызметкері деп таныстырды.
- Қазақстанда банк қызметкерлері қылмыстық топ құрып, алаяқтықпен айналысып жүр. Біз соларды ұстау үшін арнайы операция жүргізіп жатырмыз, сізден көмек көрсетуді сұраймыз.
Асекеңнің бойы тіктеліп кетті.
- Әрине, не істеуім керек?
Сөйтсе, банданы торға түсіру үшін "жемтік" керек екен, Асекеңе жемтіктің рөлін ойнап бер деген. Ол үшін Асеке банктерге барып түрлі операция жасап, "банк алаяқтары" не істейтінін мұқият бақылауы керек. Сосын әрине, өзінің құпия агент болып арнайы операцияға қатысқаны туралы ешкімге тіс жармауы керек.
Асекең "комитеттің" айтқандарын тура орындайды: банк карталарын ауыстырды, ондағы ақшасын "қауіпсіз шоттарға" аударды, банктерге өзі барып кредиттер рәсімдеп, ол ақшаны да айтқан жерлерге аударып тастады. Басқа істің бәрін ұмытып, мықтап кірісті.
Банк қызметкерлерінен көз алмай, мұқият бақылады.
Бүкіл күні соған кетсе де, Асекең өзіне риза еді. Әттең-ай, ешкімге айтуға болмайды. Мемлекеттік құпия ғой. Күні бойы қайда болдың деген әйелінің сұрағын да жауапсыз қалдырды.
Ертесіне "куратор" хабарласқан жоқ. Асекең уайымға түсті, операция жоспар бойынша жүріп жатыр ма екен? Өзі хабарласпақ еді, телефондары өшіп жатыр.
Тағы бірнеше күн өтті. Ұлттық қауіпсіздік комитетінен үн жоқ. Оңбай алданып, қораға жаман кіргенін Асекең сонда түсінді.
Ақша да жоқ, бірнеше кредит арқалады.
Естеріңізде болсын, телефон арқылы бейтаныс адамдармен Асекең сияқты сөйлесіп кетуге болмайды!
Ондай қызметкердің аты-жөнін анықтап, сосын ол жұмыс істеймін деген органға хабарласып, сұрап-білу керек.
Бейтаныс нөмірлерді, оның ішінде шетелдік нөмірлерді бұғаттап тастаңыз.
Бөтен адамдарға жеке деректеріңізді, карта шоттарыңыздың реквизиттерін, оның ішінде CVV-кодты айтуға болмайды.
Аты-жөніңізді, картадағы ақпаратты, кодтар мен құпия сөздерді ешкімге айтпаңыз. Әйтпесе алаяқтар сіздің шотыңызды қолына алады.
Банктерден келетін растайтын СМС-кодтарды да өзіңізден басқа ешкім естімесін, алақтар сондай кодпен де бөтен адамның интернет-банкингіне кіріп алуы мүмкін.
Фото: immigrantinvest.com.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
