Жүргізушілердің көгілдір отын іздеп сабылғанына бірнеше күн болған
Батыс Қазақстандағы жанармай бекеттерінің көбінде "Газ жоқ" деген тақтайша ілініп тұр. Кейбірі тек талонмен беріп жатыр екен, деп жазады kolesa.kz.
– Алматыдан келе жатырмыз, еш жерде газ жоқ: не Шымкентте, не Қызылордада. Ақтобеде аздап қалған екен. Оралға келдік, мұнда да жоқ! Қалай жетеміз? Қалай өмір сүреміз? Үкімет мұны қадағалай алмаса, не үшін отыр? Қазір Атырауға шықтық, онда да газ жоқ. екі машинаға газ құюымыз керек, күтіп тұрғанымызға екі жарым сағат болды, – деді жүргізушілердің бірі.
Мgorod.kz таратқан ақпаратқа сүйенсек, әкімдік бекеттерде отын таусылғанына су тасқыны, логистикамен байланысты қиындықтар себеп болды деп ақталыпты. Шенділер Орал – Атырау тас жолының Теңізге баратын бөлігін су шайып кеткендіктен, газды Ақтөбе арқылы тасып жатырмыз деген.
– Өндірушіде шикізат болмаған жағдайда ғана отын тапшы деп айтуға негіз бар. Энергетика министрінің бұйрығы бойынша сұйытылған газдың жаңа бағасы – 70-75 теңге. Орал мен облыс орталығынан 200 шақырымға дейінгі аумақта газдың 1 литрі 70 теңге тұрады. Одан шетке шықсаңыз, 75 теңгеге аласыз. Шілдеде 3378 тонна газ жеткізілуге тиіс. "Жайықмұнай" 2000 тонна шығарса, қалғанын Атырау мұнай өңдеу зауыты жібереді. Қосымша 1.5 тоннасын "СНПС-Ақтөбемұнайгаз" АҚ жеткізеді. Газ тасығыштар жолға шықты, ертең түнде олар Батыс Қазақстанға барады деп ойлаймын, – деді Батыс Қазақстан облысы Энергетика және ТКШ басқармасының басшысы Мирас МҮЛКӘЙ.
Дәл осындай қиындыққа Шымкент және Қызылрда тұрғындары да тап болды. "31 канал" хабарлағандай, жүргізушілер таң атпай жанармай бекеттеріне жиналып, кезекке тұрады екен. Энергетика министрлігінің өкілдері жазда сұйытылған газ тұтынатындардың саны артатынын айтты. Тапшылыққа жол бермеу үшін билік бірнеше күн бұрын Шымкентке қосымша 20 вагон жіберген, тағы 43 цистерна жақында жетеді.
Фото: youtube.com/@tv24kz.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
