Ақындар Есет Көкіұлының ерлігін айтып, тарихи деректерді мысалға келтірді
Ақтөбеде Есет Көкіұлының 355 жылдығына арналған "Еркіндік қыраны, шарықта" атты республикалық ақындар айтысы өтіп жатыр, деп хабарлайды ҚазАқпарат.
Ақтөбеде Есет батырдың 355 жылдығына орай Алға ауданы Бестамақ ауылында түрлі мәдени-танымдық кеш өтті. Спорттық жарыстар ұйымдастырылды. Ал қазіргі кезде Студенттер сарайында ақындар айтысы өтіп жатыр. Оған республикамыздың жер-жерінен келген 10 ақын, Ақтөбе өңірінен 6 ақын қатысты.
"Мақсаты − айтыс өнерін мәдениетіміздің баға жетпес асыл мұрасы ретінде халыққа жан-жақты насихаттау, ұлттық өнеріміз арқылы тарихымыздың даңқты парақтарын, елдік жолында аянбай тер төккен асыл бабаларымызды ұлықтау. Жас ақындардың шеберлігін шыңдай түсіп, көпшілікке танылуына мүмкіндік жасау, сондай-ақ өңірдегі айтыс мектебінің шығармашылық әлеуетін насихаттау негізгі міндет",- деді облыстық халық шығармашылығы үйінің өкілі Гүлнар Сейталина. Республикалық айтыста Қанат Мырзаханұлы (Жамбыл облысы), Нұрлан Мұсаев (Маңғыстау облысы), Рүстем Қайыртай (Абай облысы), Шұғайып Сезімхан (Алматы қ.), Серік Қуанған (Шығыс Қазақстан обл.), Біржан Байтуов (Шымкент қ.), Айдос Рахметов (Қызылорда обл.), Қазырет Бердіхан (Алматы қ.), Шалқарбай Ізбасаров (Атырау обл.), Рауан Қайдаров (Астана қ.) және ақтөбелік ақындар Жұлдыз Қожабекова, Марат Ахметов, Ершат Қайболдин, Жәнібек Бейбітов, Айболат Көшкінбаев, Нұрбол Жауынбаев өнер көрсетті. Айтыскерлердің өнеріне Қазақстанның халық әртісі, Мемлекеттік сыйлықтың лауреаты Асанәлі Әшімов бастаған қазылар алқасы төрелік етті.
Айтысты Жүрсін Ерман жүргізді.
Ақындар Есет Көкіұлының ерлігін айтып, тарихи деректерді мысалға келтірді. Ақтөбе жерінде туып-өскен тұлғалардың еңбегін де сөзбен өрнектеді. Сонымен бірге Димаш Құдайбергеннің өнерін, Алматыда өткен концерті, қазақ ұлының жетістігі айтылды.
