Бұл - Qazaq Oil компаниясының "қайырымды істер марафоны" аясындағы 8-ші іс-шарасы
Кезекті азық-түлік топтамасын Елорданың әлеуеті төмен отбасылары қабыл алды. Qazaq Оil компаниясы Астана әкімдігімен бірлесіп, Конституция күні қарсаңында да көмекке мұқтаж тұрғындарға қайырымдылық іс-шарасын жүргізген болатын.
Қайырымдылық акциясына "Астана жастары" еріктілері де үлес қосты, жастар ресурстық орталығының 100-ден аса өкілі тасымалмен айналысты.
Елорда әкімдігі 2023 жылдан бері дәстүрлі түрде жалғасып келе жатқан "Қайырымды істер марафонының" бұл 8-ші акциясы екенін атап өтті.
- Азық-түлік себеті бүгін әлеуеті төмен отбасылар: көпбалалы аналар, ерекше балаларды тәрбиелеп отырған жанұялар, ата-ана қамқорлығынсыз қалған балалар, зейнеткерлер, басқа да мұқтаж азаматтарға жеткізіледі, - деп атап өтті Астана әкімінің кеңесшісі Қуаныш МОЛДАБЕКОВ.
Азық-түлік топтамасының салмағы 45 келіні құрайды. Жалпы сомасы 30 млн теңге болатын 1 мың қорап таратылды.
- Әрбір қорап 45 келіні құрайды. Оның ішінде күнделікті өмірге қажет – макарон өнімдері, ұн, күріш, шемішке май, сүт, тұрмыстық химия, кір жуатын ұнтақ, тіс пастасы бар, - деді Qazaq Оil компаниясы PR департаментінің жетекшісі Анель ЕЛІКБАЕВА.
Ол өз кезегінде Qazaq Оil әрдайым әлеуметтік бастамаларды қолдайтынын, сонымен қатар, спорттық, мәдени және қайырымдылық іс-шаралардың бел ортасынан табылатынын жеткізді. Мәселен, "100 ауылға Qazaq Оil-дан 100 үстел теннисі" жобасы Қазақстан Республикасы Үстел теннисі федерациясымен сәтті жүзеге асты. Биыл ел өміріндегі күрделі кезеңде Qazaq Оil компаниясы 150 млн теңгені су тасқынынан зардап шеккендерге көмек ретінде бөлді. Сондай-ақ, компания аңызға айналған "Азия Даусы" фестивалінің қайта жаңғыруына қаржылық қолдау көрсетті, "Джулия" мюзиклінің көрсетілімін ұйымдастырды, бұл сазды әуен кешін ауыл балаларының да тамашалауына жол ашты, билеттер тегін таратылды.
- Бұл акцияның басты ерекшелігі – оның бір реттік емес, жүйелі түрде жүргізілуінде. Qazaq oil әр тоқсан сайын әкімдікпен бірлесе отырып, көмекке мұқтаж отбасыларға мың қораптан азық-түлік топтамасын таратады. Біз үшін әлеуметтік бастамалардың басы-қасында болып, қиындыққа тап болған адамдардың өміріне сәл де болса жәрдеміміз тиіп жатса сол маңызды, - деді Анель Елікбаева.
Республика күні осындай қайырымдылық топтамасы көптеген тұрғынға тосын сый болғаны жасырын емес.
Сондай жанның бірі – "Алтын алқа" иегері Гүлшат ЕРІМБЕТОВА. Ол 8 баланың анасы, бала күтімімен үйінде отыр. Бүгінде бес баласы мектеп оқушысы, ал қалған үш бүлдіршіні әлі кішкентай екен.
- Qazaq Оil компаниясына және Астананың Алматы ауданының әкімдігіне Республика күнімен құттықтағанына, көпбалалы аналарға қолдау танытқанына алғыс білдіремін және мен де өз атымнан барша халқымызды мерекемен құттықтаймын, өркендеу мен бақыт тілеймін! – деді ол.
Qazaq oil компаниясының бұл мейірімді ісі Валентина үшін де күтпеген сый болды. Зейнеткер қызы екеуі ерекше баланы тәрбиелеп отыр. Сал ауруы салдарынан баланы зондпен тамақтандырады екен.
- Осындай қамқорлық пен түсіністік танытқандарыңыз үшін рахмет айтамыз. Мерекеміз құтты болсын! Бар жақсылықты тілеймін! – деп кейуана еріктілерге ерекше алғысын жеткізді.
Әкімдіктегілер де Qazaq Оil компаниясына қайырымдылық іс-шарасына қолдау білдіргені үшін ризашылық танытты.
- Бизнес өкілдері мен меценаттарды осындай қайырлы істерге үлес қосуға шақырамыз. Қала әкімдігі мұндай акцияларды жыл сайын ұйымдастырады, - деп атап өтті Қуаныш Молдабеков.
