Мемлекет қаржысына салғанына қарамастан, оған халық кіре алмайды
"Әділдік жолы" қоғамдық бірлестігінің атқарушы директоры Дидар СМАҒҰЛОВ Абай облысындағы, Семейден Қарауыл ауылына дейінгі трасса бойындағы дала дәретханасының техникалық сипаттамаға сәйкестігін бағалап, өңірдің мемлекеттік ішкі аудит департаментінен жауап алды.
Облыстағы жаңа нысанға барып-қайтқан соң қоғам белсендісі алған әсерімен әлеуметтік желілерде бөлісті.
"Бұл дәретхана әлі күнге дейін жұмыс істемейді екен. Бірақ ол 2024 жылдың ақпан айында қабылданып, ақшасы толық төленген болатын. Семейдің қу шенеуніктері сатып алынған бұл нысанды (санитарлық-гигиеналық торап) автомобиль жолдарын күтіп ұстау жұмыстарының ішіне тығып қойыпты. "Семей жолдары" ЖШС 1,5 жылда 2 миллиард теңгеден астам сомаға жолдарды күтіп ұстау жұмыстарын орындап жатыр. Мемлекеттік ішкі аудит департаментінің жауабында дәретхана Абай облысының жолаушылар көлігі және автомобиль жолдары басқармасының бұрынғы басшысы Асылбек НҰҒМАНОВТЫҢ актімен қабылданғаны, оның бір ай бұрын қызметінен кеткені айтылған. Сонымен қатар, Мемлекеттік ішкі аудит департаменті тауарлық сараптама жүргізу қажеттігін, бірақ оған ақша жоқ екенін айтты", - деп ол жазды.
Айтпақшы, сол департаменттің деректеріне сәйкес, далада орнатылған модульге екі жылға кепілдігік берілген (оның жарты жылы өтті, дәретхана әлі жұмыс істемейді), онда сауда залы, ерлер дәретханасы, әйелдер дәретханасы, мүгедектерге арналған дәретхана, персонал бөлмесі және техникалық бөлме, электрлік (конвекторлық) жылыту қарастырылған.
Бағасына қарамастан, алтын жалатылған унитаздардар атымен жоқ. Сонша ақшаның қайда кеткенін тексеруге құлық жоқ. Қоғам белсендісі жазғандай, ішкі аудит департаментінің ақпаратына сәйкес, бұл нысан мен оған жұмсалған қаражатқа тауарлық сараптама жүргізу қажет, бірақ қаржыландырудың болмауына байланысты ол да жоқ. Сондықтан "құда да тыныш, құдағи да тыныш" демекші, тексермей-ақ қойсақ депті.
"Дәретханаға кіру үшін бірнеше рет қоңырау шалып, күзетшіні шақырдық, ол келіп, ашу үшін. Иә, жұмыс істемейтін дәретхананы екі күзетші кезекпен күзетеді. Жарық пен су әлі қосылмаған. Төбесі қазірдің өзінде құлап жатыр, жалпы материалдардың арзандығы және құрылыстың "атүсті" атқарылғаны көзге көрініп тұр. Унитаз емес, едендегі тесіктер тұр. Унитаз тек қозғалысы шектеулі азаматтар үшін ғана бар. Құжаттарда көрсетілгендей, жылыту жүйесі мен келушілер санын есептейтін интеллектуалды бейнебақылау жүйесін көрмедім", - деп қорытындылады өз сапарын Смағұлов.
Аймақтық мемлекеттік ішкі аудит департаменті осы фактіге назар аудару үшін жергілікті Антикорға хат жолдады.
Бірақ сыбайлас жемқорлыққа қарсы күресушілерден әлі үн шықпай тұр.
Фото: Дидар Смағұловтың facebook-тегі парақшасынан.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
