Тұрғындар жергілікті биліктен шұғыл әрекет етуді сұрады
8 наурыз күні Талдықорған маңындағы тұрғындар Еңбек ауылының жанындағы мұсылмандар зиратының су астында қалғанын айтып, дабыл қақты. Бұл зираттың жері қала аумағына кіреді.
Туыстары осында жерленген тұрғындардың айтуынша, көбіне жақында ғана қойылған қабірлерді су басты. Кей тұрғындар ескерткіштер мен тіпті марқұмдардың денелері суға кетуі мүмкін екенін айтып, жергілікті биліктен шұғыл шара қолдануды сұрады.
Өтенай ауылдық округі әкімдігінің хабарлауынша, шұғыл шаралар қабылданып, зират аумағында еріген судың жиналуына жол бермеу жұмыстары жүргізілді.
Округ әкімі Руслан МАЛТАЕВТЫҢ мәліметінше, 8 наурызда сағат 14:00-ден бастап зират аумағындағы еріген қар суын сору жұмыстары жүргізілді. Бұл жұмыстарға 2 арнайы техника мен 8 адам жұмылдырылды. Шамамен 150 метр арық қазылып, еріген судың 97%-ы сорылды. Жағдай округ әкімдігінің бақылауында.
Жетісу облысы әкімдігінің ресми ақпаратына сәйкес, су тасқынының алдын алу шаралары аясында 2 372 км арық жүйесі, 768 км канал, 3 389 су өткізу нысандары тазартылып, елді мекендерден 21 мың м³ қар шығарылды.
Сонымен қатар, 572 дана арнайы техника, 201 мотопомпа және 31 су көлігі дайындалған. Облыста барлығы 235 эвакуациялық пункт бар, олар төтенше жағдай кезінде тұрғындарды қабылдай алады. Су тасқынының алдын алу шараларына бюджеттен 1,8 млрд теңгеден астам қаражат бөлінді.
Фото: әлеуметтік желілерден.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
