Күн сайын кемінде екі рет барлық қызметтік және қосалқы үй-жайларда дезинфекциялау жұмыстары жүргізіледі
Биылғы күзден бастап мерзімді әскери қызметке шақырылған сарбаздар жылына екі рет коронавирусқа ПТР-тестіден өтеді, деп хабарлайды ҚазАқпарат тілшісі.
"Осы күзде көктеммен салыстырғанда әскерге шақырылушыларға ПТР-тест екі рет жүргізіледі. Алғашқысы – әскерге шақырылып, жиын-пунктінде жүрген кезінде, екіншісі – жас буын әскери бөлімдерге келген кезде алынады. Әскерге шақыру кезінде және жиын-пункттерінде әскерге шақырылушылар және медициналық комиссия мүшелері медициналық маскалармен және бактерияға қарсы құралдармен қамтамасыз етілді. Күн сайын кемінде екі рет барлық қызметтік және қосалқы үй-жайларда дезинфекциялау жұмыстары жүргізіледі. Қолданылып жүрген тәжірибені ескере отырып, әскерге шақырылушыларды хабардар ету, оларды медициналық тексерістен өткізу, сонымен қатар олардың жиын-пункттерінде болулары кезінде Қорғаныс істері жөніндегі департаменттер, басқармалар мен бөлімдер қызметкерлерімен іс-қимыл жасау алгоритмдері бір ізге қойылды", - деді бүгін Орталық коммуникациялар қызметінде өткен баспасөз мәслихатында ҚР Қарулы Күштерінің Бас штабы Ұйымдастыру-жұмылдыру жұмыстары департаментінің бастығы Сәкен ЖҮСІПОВ.
Оның айтуынша, әскерге шақырылушылардан респираторлық ауруға тән белгілер анықталған кезде әрекет ету әдісі қарастырылған.
Қазақстанда биыл күзде 17 мыңнан астам азамат әскерге шақырылады.
Фото: coronavirus2020.kz.
