Өңір ауылдарының халқын толғандырған негізгі мәселелердің бірі – интернеттің жоқтығы
Шығыс Қазақстан облысындағы 357 елді мекеннің 139-ында әлі интернет тартылмаған, деп хабарлайды ҚазАқпарат.
Өңір ауылдарының халқын толғандырған негізгі мәселелердің бірі – интернеттің жоқтығы. 2022 жылы 17 ауыл, 2023 жылы 20 ауыл, 2024 жылы 45 ауыл интернетпен қамтамасыз етілген. Қазіргі уақытта әлі 139 елді мекенде интернет жоқ.
Облыс әкімдігінің мәліметінше, биыл бұл бағыттағы жұмыс жалғасады. Жоспар бойынша 60 ауылға интернет тартылмақ.
- Сол үшін жергілікті атқарушы органдар мен байланыс операторлары арасында келісімшарттар жасалып жатыр. Жақында Алтай ауданына қарасты Феклистовка ауылында интернет тартылды. Халықтың арыз-шағымдарынан кейін ауылды байланыспен қамту үшін ¾G стандартына сай базалық станция іске қосылды. Оның жылдамдығы 86,9 Мбит/с-қа дейін жетеді. Байланыс операторы “Кар Тел” ЖШС өз қаражаты есебінен антенна-мачталық құрылымды орнатып, электр желісін тартты. Сондай-ақ Tele2 және Kcell/Activ операторларының желісін ортақ пайдалану мүмкіндігі қарастырылып жатыр, - делінген ақпаратта.
Фото: Мухтор Холдорбеков / Kazinform.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР.
