Сенатор Ғалиасқар Сарыбаев ешқандай заң бұзылған жоқ деп ақталуда
Жетісу облысы Кербұлақ ауданы Сарыөзек ауылында қоғам белсендісі Серік АХЛАСОВ соңғы төрт айдан бері сенатор Ғалиасқар САРЫБАЕВТЫҢ заңсыз әрекеттерін әшкерелеуге тырысып келеді. Оның сөзінше, Сарыбаев мырза Кербұлақ ауданының әкімі болып тұрған кезінде бір жер учаскесін шетел азаматына заңсыз сатып жіберген-мыс.
Қазір әлгі жерде Қазақстан-Сингапур цемент зауыты жұмыс істеп тұр. Ол зауыттың жұмысына аудан тұрғындары тарапынан жиі шағым түсетіні бөлек әңгіме. Жақында Серік Ахласов осы кәсіпорын мен сенатор туралы ҚР ҰҚК төрағасына ресми хат жолдады.
- ҰҚК менің хатыма жауап берген жоқ, жергілікті прокуратураға сілтей салды, ал прокуратура Жер комитетіне сырғыта салды. Біз білікті азаматтармен бірге бұл жер телімінің ауыл шаруашылығы мақсатындағы жерлер санатына жататынын анықтадық. Алайда ресми құжаттарда ол жер учаскесі “ауыл шаруашылығы мақсатында пайдаланылмайтын, өнеркәсіп, көлік, байланыс, ғарыш қызметі, қорғаныс, ұлттық қауіпсіздік, ядролық қауіпсіздік аймағы және басқа да жерлер” санатына енгізілген.
Онымен қоса, бұл жер учаскесін бір санаттан екіншісіне ауыстыру туралы жергілікті атқарушы органның қаулысы жоқ. Демек, бұл жер телімін беру цемент зауытының құрылысына беру – заңсыз болған. Бұған қоса, ҚР Жер кодексінің 48-бабына сәйкес, мемлекеттік меншіктегі және пайдалануға берілмеген жер телімдерін меншікке беру немесе жалға беру – аукцион арқылы өтуі тиіс. Тек инвестициялық жобаларды іске асыру жағдайында ғана жер учаскесі тікелей берілуі мүмкін.
Біз зерттеген материалдарда цемент зауытының құрылысы инвестициялық жоба ретінде танылғанын растайтын ешқандай құжат жоқ. Сондай-ақ ҚР Жер кодексінің 24-бабына сәйкес, шетел азаматтары, азаматтығы жоқ тұлғалар, шетелдік заңды тұлғалар, шетелдік қатысуы бар Қазақстан Республикасының заңды тұлғалары, халықаралық ұйымдар, халықаралық қатысуы бар ғылыми орталықтар және қандастар ауыл шаруашылығы мақсатындағы жер телімдеріне жеке меншік немесе жер пайдалану құқығына ие бола алмайды, - дейді Серік Ахласов.
Біз сенатор Ғалиасқар Сарыбаевпен байланысып, оған жергілікті тұрғындардың барлық өтініштері мен жиналған құжаттарды, оның ішінде Сарыбаев мырза Кербұлақ ауданының әкімі болған кезде қол қойған кейбір ресми құжаттарды жолдадық.
- Есіме енді түсіріп отырмын. Меніңше, ол инвестициялық жоба болатын. Ол жерге зауыт салынды, ол жұмыс істеп тұр, онда 300-ден астам адам жұмыс істейді. Әрине, зауыттың жер телімі инвестор мен меншік иесіне тиесілі болуы тиіс, әйтпесе олар қалай жұмыс істемек? Бұл жерде ешқандай заң бұзушылық жоқ, - деп түсіндірді сенатор Ғалиасқар Сарыбаев.
Фото: ашық дереккөзден.
Аударған А.Олжаев.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
