Пара алған мектеп директорына үкім шығарылды
1983 жылы туған Нұрали АРЫСЛАНОВ "Ыбырай Алтынсарин атындағы №17 жалпы орта білім мектебінің" директоры болған еді.
Енді ол Түркістан облысы Сарыағаш аудандық сотының үкімімен ҚР Қылмыстық кодексінің 366-бабы, 2-бөлігі бойынша (ірі көлемде пара алу) кінәлі деп танылды.
Тергеу барысы мен сот барысында анықталғандай, мектепте аз қамтылған отбасылардан шыққан 25 жоғары сынып оқушысы болған, олар тегін тамақпен қамтамасыз етілуі тиіс еді. Олардың тамағына ай сайын 50 мың теңге бөлінетін. Ыстық тамақты 2017 жылдан бері мемлекеттік бағдарламалар бойынша тендерлерді алып жүрген кәсіпкер қамтамасыз етіп отырған.
2023 жылдың желтоқсан айында мектеп директоры әй-шәй жоқ, кәсіпкерден төрт айдың атқарылған жұмыс актілеріне қоятын қолы үшін 200 000 теңге талап еткен. Кәсіпкер директор көрсеткен банк шотына қажетті соманы аударған, бірақ одан соң Сыбайлас жемқорлыққа қарсы агенттікке арызын айтып келді.
Нұрали Арысланов өзіне тағылған айыптарды үзілді-кесілді мойындамай, кәсіпкерді арандатушы деп атады. Оның айтуынша, оқушыларға ыстық ас ретінде бірінші және екінші тамақ берудің орнына кәсіпкер гамбургер береді-мыс.
Істі қараған судья Мақпал ЖҮНІСОВА тергеу материалдарын зерттеп, куәгерлерді тыңдаған соң мектеп директорына тағылған айыптардың дәлелденгені туралы қорытындыға келді. Сот экс-директордың әрекеттерінен жазаны ауырлататын мән-жайларды таппады. Алайда айыпталушының кінәсін мойындамауына байланысты сот оны тек қоғамнан оқшаулау арқылы түзету мүмкін деп шешті.
Сот үкімі – орташа қауіпсіздік мекемесінде үш жыл бас бостандығынан айыру.
Үкім әлі заңды күшіне енген жоқ.
Фото: © Ratel.kz / Айдын Олжаев.
Аударған А.Олжаев.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
