Қазақстанның ірі платформаларда мемлекеттік қызметтерді ұсыну тәжірибесін халықаралық ұйымдар оң бағалады
Бұл туралы Jibek Joly телеарнасының "Уәде" бағдарламасына сұхбат берген Цифрлық даму, инновациялар және аэроғарыш өнеркәсібі министрі Бағдат Мусин айтты, деп хабарлайды Kazinform.
Бағдарлама барысында жеке мәліметтерді жекеменшік қаржылық ұйымдарға (Kaspi.kz, Halyk платформалары) беру қаншалықты дұрыс болғаны туралы сұрақ қойылды.
"Мәселен, eGov.kz қосымшасына кірген кезде "Kaspi.kz платформасына цифрлық құжаттар туралы мәліметтерді беруге рұқсат бересіз бе?" деген сауал болады. Сіз аталған платформада құжаттар туралы деректердің болуына өзіңіз рұқсат берсеңіз, дәл солай осы рұқсатыңызды кері қайтарып алуға болады. EGov.kz қосымшасында осындай мүмкіндіктер бар", - деді Б.Мусин.
Министр Kaspi.kz немесе Halyk платформаларының қосымшаларына қосылған кезде "мемлекеттік қызметтер" деген батырма болатынын еске салды.
"Тиісті сілтемені басқан кезде, "еGov.kz-ке осы мәліметтерді Kaspi.kz-ке қондыруға рұқсат беремін" деген хабарлама аласыз. Осы батырманы баспасаңыз, сіздің құжаттар мемлекеттік дерекқордан басқа платформаларда ашылмайды", - деді ведомство басшысы.
Бұл тұрғыда ол Қазақстандағы осы тәжірибені халықаралық ұйымдар зерттеп, мұны дұрыс бағыт екенін растағанын айтты.
"Сондықтан бұл тәжірибе халықаралық деңгейде оңтайлы бағаланып, басқа да мемлекеттерде іске асыруға болатынын ұсынды. Ресейде, Өзбекстанда және басқа да елдерде осыны нұсқаулық ретінде алып отыр", - деді Бағдат Мусин.
Фото: Jibek Joly.
