Өлтірілген сәтінде еркек қатты мас боп жатқан
Түркістан облысының қылмыстық істер жөніндегі мамандандырылған ауданаралық сотында 1974 жылы туған әйел, Сайрам ауданының Х. есімді тұрғыны қасақана кісі өлтірді деп айыпталып, оған үкім шығарылды. Әйел күйеуін киімнің белгігімен буындырған екен.
Айыпталушының сөзінше, оның күйеуі жылдар бойы ішкілікке салынып, шаңырақтың берекесін қашырған. Ішкен сайын әйелін де, балаларын да сабап, соққыға жығып келген. Әсіресе, мүгедек болып туған кенже ұл әкесінен көп қорлық көрген.
Биыл 12 сәуірде жұмыстан үйге келген әйел тағы да қу араққа "тойып алған" отағасының ұйықтап жатқанын көрген. Балаларға кешкі тамағын беріп болғанда күйеуі оянып, араққа ақша талап еткен. Әйел қолындағы соңғы 1500 теңгесін бере салыпты. Үйден шығып кеткен күйеуі түнде тәлтіректеп қайтып келді. Соған қарамай әйелінің бетіне түкіріп, өзінің ұлын өлтірем деп кіжінген. Сосын есік алдындағы баспалдақта қылжиып ұйықтап қалды.
Шыдамы әбден таусылған әйел осы сәтті пайдаланып, беліндегі белдігімен ұйықтап жатқан күйеуінің мойнын орап, қыса бастады. Бес минут бойы тұншықтырған соң еркектің демі үзілді.
Ертесінде әйел көршілері мен туыстарына "күйеуім оянбай жатыр" деген суыт хабар берді. Бірақ оның неден өлгені тез анықталып, сол күні әйел қылмысын мойындады.
Марқұмның туыстары әйелді кешірмей, оған барынша ауыр жаза тағайындауды талап етті. Түркістан облысының қылмыстық істер жөніндегі мамандандырылған ауданаралық сотының төрағасы Сәкен ТҰРҒЫНБАЕВ қылмыстың ауырлығын ескере отырып, әйелді 8 жылға бас бостандығынан айыруға үкім шығарды.
Үкім заңды күшіне енгеннен кейін әйел орташа қауіпсіздік режиміндегі мекемеде жазасын өтейді.
Фото: zhukvesti.ru.
Аударған А.Олжаев.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
