Естерін енді жиып, "Ермұхамет, кет" дегендей қылып жатыр
"Қазақстан халық партиясы" шулап жатыр. Оның өкілдері партияның төрағасы боп отырған атышулы Ермұхамет ЕРТІСБАЕВТЫ енді көргіміз келмейді дейді.
"Қазақстан халық партиясының" белсенді мүшелері Алматыда баспасөз жиынын өткізіп, төраға Ермұхамет Ертісбаевтың отставкасы мәселесін қарастыру үшін партияның кезектен тыс съезін шақыруды талап етті.
Партия мүшесі Асхат АСЫЛБЕКОВ әсіресе ашулы. Ертісбаев жынымызды келтіріп, қанды әбден ішті дейді.
"Назарбавтан ешқашан бас тартпаймын деп бөсіп жүр. Соның осындай қисық сөздері үшін әр жерде мен жүремін ақталып. Бүкіл ел болып ескі Қазақстаннан онсыз да құтылай алмай жүргенде керісінше сайрайтын төрағамыздың сиқы осы. Өткен парламентте депутаттық 10 мандат бар еді, оның бесеуін әрең алдық. Абыройы нашар Ертісбаевтың кесірі жатыр мұнда. Өзіне барып, әй, мынауыңыз не десек, "да, я такой" деп міз бақпайтын біреу екен өзі.
Ақша жағы анау. Парламенттік партия болған соң мемлекеттен ақша аламыз. Сосын демеушілер беретін бюджеттік қор бар еді. Сөйтсек, партияның ақшасынан 250 мың долларды жабдық алуға жұмсап тастапты. Өзінің "Ертысбаев live" дейтін Youtube-каналында 20-дан астам адам жұмыс істейді, жалақы қоры 50 мың доллар, бұл шамамен 23 млн теңге. Жалдайтын студиясы Астанадағы "Қазмедианың" жоғарғы қабатында жайғасқан, оған айына 25 млн теңге кетеді. Оның жекеменшік "Ертысбаев live" каналына жылына партияның 300 млн теңгесі жұмсалып жатыр.
Ең сорақысы, әйелін өлтірген Бишімбаевты ақтап шыр-пыр болғаны. "Бишімбаев кінәлі емес, Салтанат мас еді, унитазға өзі құлап өліп қалды. Панкреатиті қозып, ішкен шарабынан уланды", деп қуып кетті. Оның бәрі партияның атына кір келтірмегенде қайтеді", - деп ағынан жарылды Асхат Асылбеков.
Фото: the-steppe.com.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
