Мерекенің ішіндегі мереке бола ма? Біз қазір көп нәрсені шатастырып жатырмыз
Этнограф Серік ЕРҒАЛИ қазақта амал деген мерекенің болмағанын мәлімдеді. Бұл туралы ол Qalam YouTube арнасына берген сұхбатында айтты, деп хабарлайды Caravan.kz.
Мәдениеттанушының сөзіне сенсек, амал мереке емес, ай атауы болған.
“Бұрын март айын наурыз деп атамаған. Наурыз деп 1988 жылдан бастап айта бастады. Оған дейін қазақ айдың атын наурыз емес, амал деп атады. Март амал айы болды. Амал келді, жыл келді деген тәмсіл содан шыққан. Амал айы келсе, біздің жаңа жылымыз келді деген сөз. Амал деген мереке жоқ, болған емес. Біз қазір көп нәрсені шатастырып жатырмыз. Айтсақ та, дәлелдесек те, оны ескеріп жатқан ешкім жоқ. Мен бұны айтқаныма бірнеше жыл болды. Қазір мемлекеттік деңгейде мәдениет министрлігі тұжырымдама жасаған болып, 14 наурызды амал мерекесі дейді. Сонда мерекенің ішіндегі мереке бола ма екен? Жалпы қазақ наурызды, жаңа жылды 14 нен бастайды”, - дейді Серік Ерғали.
Этнограф көрісу дәстүрінің белгілі бір аймаққа емес, тұтас қазақ халқына ортақ екенін де атап өтті.
“Шығыстағы азаматтар біз көрісуді білмейміз дейді. Ал, Шәкәрім атамыз Ахат деген ұлына 14 наурыз қазақша жаңа жыл, Ұлыстың ұлы күні деп жазып кеткен. Абай атамыз да “Жаз” деген өлеңінде көрісіп, құшақтасып деп келтіреді. Қазақтың барлық саналы адамдарының бәрі көрісу туралы жазған. Оны бір өңірдікі деуге болмайды. Мысалы, менің ауылым да көрісті. Бірақ сонымен мақтанатындай ештеңе жоқ. Олай қазақты бөлуге болмайды”, - дейді ол.
Фото: Caravan.kz.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
