Еске сала кетейік, осыған дейін барлық әлеуметтік желілерде облыстың экс-әкімі Қуанышбек Ысқақовтың тұтқындалғаны туралы мәлімет тарағанды
Бүгін Қызылорда облысына су жаңа әкім тағайындалды. Таныс болыңыздар: Гүлшара ӘБДІХАЛЫҚОВА. 1965 жылдың 15 мамырында дүниеге келген.
Шын мәнінде бұл елеулі оқиға болып тұр, себебі осыған дейін ел тарихында облыс әкімінің креслосына әйел отырмаған еді. Кейбір деректерде оны Алматы өңірінде туылған деп жазылғанымен, негізі Гүлшара Наушақызы осы Сыр елінің тумасы. 1987-1994 жылға дейін Қызылорда облыстық әлеуметтік қамсыздандыру басқармасында инспектор, бөлім бастығы қызметтерін атқарған.
Бұл кадрлық ротация «әйел ел басқара алмайды» деген стереотипті түбегейлі бұзды деген пікірде кейбір саясат төңірегіндегілер. «Меритократияға бағытталған батыл қадам болды» деп жазады және біреулер. Қазақта сындарлы сәтте ел тізгінін кім көрінгенге ұстатпайтыны тарихтан мәлім, соған қарағанда Гүлшара Наушақызы Қызылорда облысын қазіргі өтпелі кезеңнен іргесін бүтін, ісін сәтті алып шығар деген үміт бар. Айтпақшы, Қызылорда қалай дегенмен провинция саналатындықтан руға бөліну жағынан да алдына жан салмайтыны жасырын емес. Бүгін таңертеңнен бастап әлеуметтік желі беттері жаңа әкімнің руын, туыстарын түгендеп, түрлі жорамалға жол ашуда. «Өзіміздің ақұдай екен» деп көңіл бірлегендер де баршылық.
Ал, енді бір тарап «әйел адамды билікке әкелу арқылы жоғары жақ халықты нәзік жан иелері де басқара алатынына көз жеткізу, бойын үйрету» деген пікірін де айтып қалуда.
Еске сала кетейік, осыған дейін барлық әлеуметтік желілерде облыстың экс-әкімі Қуанышбек ЫСҚАҚОВТЫҢ тұтқындалғаны туралы мәлімет тарағанды. Алайда Сыбайлас жемқорлыққа қарсы күрес агенттігі бұл ақпаратқа қатысты ешқандай мәлімет бермеді. Үнсіз қалған ведомство ел ішінде небір қауесеттердің таралуына жол беріп үлгерді.
