“Газпромның” тағдыры Путиннің оңбай қателескенін көрсетті
Ресейдің аса ірі газ монополисі “Газпром” ауыр дағдарысқа ұшырады. Ол Еуропадағы негізгі нарығынан айырылып қалды, деп жазады Reuters. Компания миллиардтаған шығындарға батып, қызметкерлерін жаппай қысқартып, енді өзінің элиталық кеңсе ғимараттарын сатуға мәжбүр.
Осыдан 11 жыл бұрын “Газпром” басшысы Алексей МИЛЛЕР “Еуропа болашақта Ресей газына барған сайын тәуелді бола түседі” деп бөскен. Алайда Ресейдің Украинаға басып кіруі мен халықаралық санкциялардан кейін керісінше жағдай туды: Еуропа Ресей газынан бас тартып, “Газпромды” негізгі табысынан айыра салды.
Енді бизнесін дамытудың орнына орыс компаниясы активтерін сатуға мәжбүр, кезінде ең табысты саналатын экспорттау бөлімінде қысқарту жүріп, онда енді бірнеше адам ғана қалды. Reuters мәліметінше, қалған қызметкерлер қазір тек шығындарын өтеу мен бұзылған келісімдер үшін өтемақы талап еткен еуропалық бұрынғы сатып алушылармен соттасуда.
“Газпромның” Еуропа нарығынан айырылғаны ауыр болды: компанияның мыңдаған қызметкері жұмыссыз қалуы мүмкін.
Компания басшылығы атақты “Лахта-центр” ғимаратында отырған 1500 жұмыс орнын қысқартуды мақұлдады, бұл ғимарат “Газпромның” Санкт-Петербордағы басты символы еді. Енді оның өзі де сатылып кетуі мүмкін.
Батыс санкциялары “Газпромды” жүндей түтті. Сарапшылардың пікірінше, Еуропа нарығынан айылырғаннан кейін компанияның ес жиюы мүмкін емес. Еуропа Ресей газынан толық бас тартып, АҚШ, Қатар және Норвегия сияқты балама жолдарды тауып алды. Қытай “Газпромға” шығындарын өтеуге көмектесе алмайды: бағалар төмен, көлемдер жеткіліксіз. Еуропалық компаниялармен соттасуы тағы миллиардтаған шығындарға әкелуі мүмкін.
“Газпром” кезінде Кремльдің Еуропаға әкіреңдеуіне мүмкіндік беретін құралдарының бірі болған, енді Ресей бұл тетігінен айырылды. “Газпромның” оңбай сүрініп, батпаққа бетпен құлағаны – Ресей экономикасына жасалған тағы бір ауыр соққы.
Фото: Kursiv.Media.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
