Димаш АҚШ-тағы ең сұранысқа ие он әртістің қатарына кірді. Әнші дауыс берген жанкүйерлеріне алғыс білдірді
Әлемге әйгілі қазақ әншісі Димаш Құдайбергеннің Across Endless Dimensions әніне түсірілген клипі MTV USA-дағы апта сайынғы рейтингтің көшін бастады, деп хабарлайды Sputnik.
Әртіс Instagram-дағы парақшасында өз шығармашылығының жанкүйерлеріне алғысын білдірді.
"Across Endless Dimensions әніне түсірілген менің бейнебаяным бүгін MTV USA-да бірінші орынға ие болды. Дауыс бергендеріңіз үшін көп рахмет. Сіздер маған әрдайым және кез келген жағдайда қолдау білдіріп келесіздер. Мың алғыс", - деп жазды Димаш Құдайберген.
Айта кетейік, Friday Livestream MTV бағдарламасының жүргізушісі Кеван Кенни өзінің Twitter-дегі парақшасында қазақстандықты рейтингтегі жеңісімен құттықтады.
"Димашты чарттағы апталық жеңісімен және MTV-дегі ең сұранысқа ие әртістердің ондығына кіруімен құттықтаймын", - деп жазды америкалық жүргізуші.
Қазір Димаш Құдайбергеннің Youtube-тегі Across Endless Dimensions әніне түсірілген клипі 2,5 миллионға жуық қаралды.
