Оның саксофонда ойнауына мүмкіндік бермей қойған деседі
Әйелін өлтіргені үшін сотталған бұрынғы ұлттық экономика министрі Қуандық БИШІМБАЕВ Степногорскте жазасын өтеп жатыр.
Бірақ тыныш жатпай, тәртібім мен белсенділігім еленбеді, репетициямен айналысуыма бөгет жасады, деп шағымданыпты.
Қуандық Бишімбаев отырған қауіпсіздігі жоғары колониядағы ережелерге сәйкес, мекемеде алғашқы ынталандыру шарасының қызығын колонияға келгеннен кейін кемінде үш ай өткен соң ғана көруге болады. Ынталандыратын игіліктер сотталғанның тәртібі жақсы болса, еңбекке, оқуға зерек болып, жұмыстар пен тәрбиелік іс-шараларға белсенді қатысса, сондай-ақ өз қылмысымен келтірген залалды өтеу шараларын қабылдағаны үшін беріледі.
Бишімбаев мекемеде шахмат турнирін ұйымдастырып, онда өзі жеңімпаз болыпты. Сосын Рахымжан ҚОШҚАРБАЕВТЫҢ жүз жылдығына орай сотталғандарға қазақ лейтенантының Рейхстагқа жеңіс туын ерлікпен тіккені туралы дәріс оқыпты.
Алайда Ratel.kz-ке ақпарат берген дереккөздің мәліметінше, оған бұл белсенділігі үшін бір де бір ынталандыратын жеңілдік берілмепті, ал колонияға одан кейін түскендер ондай жеңілдіктерді алып үлгеріпті.
Рас, қауіпсіздігі жоғары колонияда ынталандыру деген бар. Сол арқылы сыйақы алуға, қосымша қысқа мерзімді кездесу, мереке күндері азық-түлік пен қажет заттарға 1 АЕК-ке дейінгі сомаға қосымша ақша жұмсауға рұқсат алу, бұрын салынған жазаны мерзімінен бұрын алып тастау мүмкіндігі беріледі.
Дереккөздің мәліметінше, Бишімбаев ынталандыру шараларының жоқтығына шағымдануға тырысқаннан кейін, оның саксофонда ойнап жүрген репетиция бөлмесі жөндеуге жабылып қалыпты. Қашанға дейін жабылғаны белгісіз.
Фото: Жоғарғы соттың баспасөз қызметі.
Аударған А.Олжаев.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
