Күрт қымбаттаудың орнына 2027 жылға дейін біртіндеп қымбаттайды
Энергетика министрлігі Қазақстанның жанармай нарығындағы бензин мен дизель құнын бағаның “табыс теңсіздігі” (диспартитет) ретінде бағалап отыр. Министрліктің бензин мен дизель бағасының қалыптасуы туралы анықтамасында мұндай теңсіздік 2024 жылы “сұр экспорттың” көлемін арттырғаны айтылған, деп жазады ҚазАқпарат.
- Жанар-жағармайдың заңсыз сыртқа шығарылуына қарсы қабылданып жатқан шараларға қарамастан, бензин мен дизель отынының қоры 1,007 млн тоннадан 646 мың тоннаға дейін, ай сайын 10 мыңнан 50 мың тоннаға дейін азайып кеткен. Оның ішінде бензин қоры 453 мың тоннадан 382 мың тоннаға дейін (-16%), дизель қоры 554 мың тоннадан 264 мың тоннаға дейін (52%) азайды, - делінген анықтамада.
Ведомство мамандары жанар-жағармай бағасын қалыптастырудағы саясатын былай түсіндіреді.
- 2024 жылдың 18 қарашасында ҚР Президенті жанындағы Энергетикалық кеңес 2025 жылдың қаңтарынан бастап жанар-жағармайдың бөлшек және көтерме бағасына қойылып жүрген шекті алып тастау туралы шешім қабылдады. Дей тұрғанмен, бағаны бір жолда литріне 50-75 теңгеге күрт қымбаттатудың орнына 2027 жылға дейін біртіндеп әрі ұдайы теңестіру арқылы теңгерімді баға қалыптастыру тетігі қабылданады. Мысалы, 2025 жылдың ақпан айынан 2026 жылдың тамызына дейін негізгі жанармайдың бағасын ай сайын литріне 4 теңгеге өсіру арқылы теңестіріледі, - делінген ведомство мәліметінде.
Нақтырақ айтсақ, бензин бағасы 2025 жылдың ақпанынан 2026 тамызына дейін литріне 205 теңгеден 281 дейін, дизель бағасы 295 теңгеден 343 теңгеге дейін өседі.
- Дегенмен, бағаны біртіндеп өсіру механизмі нарықтағы ахуалға, Ресей Федерациясындағы жанармайдың жеткізу құнын есептемегендегі бағасына және іргелес елдердегі орташа бағаға байланысты қайта қаралуы мүмкін. Өйткені аталған елдерге заңсыз жанармай ағыны бар және Қазақстан арқылы жанармай транзиттеуге субсидия төленеді. Ал ауыл шаруашылығы өнімдерін өндірушілерге қазіргі жанама субсидияның орнына тікелей субсидия төлеу мәселесі пысықталып жатыр”, - дейді Энергетика министрлігі Мұнай тасымалдау және өңдеу департаменті директорының орынбасары Талғат МАКУОВ.
Фото: pixabay.com.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
