Көші-қонда да төмендеу байқалды
Қазақстанда ресейлік инвесторлардың қатысуымен жұмыс істейтін компаниялардың саны қысқарды. Дегенмен, тауар айналымының аздап өскені байқалады, деп хабарлайды LS.
Биылғы 1 қаңтардағы мәліметке сәйкес, Қазақстандағы ресейлік заңды тұлғалар мен филиалдардың жалпы саны 18,8 мыңды құрады. Бұл өткен жылмен салыстырғанда 3%-ға немесе 583 компанияға аз.
Аталған кәсіпорындар негізінен сауда (7,7 мың), ақпарат және байланыс (2,5 мың), кәсіби, ғылыми және техникалық қызмет (1,7 мың) салаларында жұмыс істейді.
Екі ел арасындағы сауда айналымында аздаған өсім бар. 2024 жылы тауар айналымы $27,8 млрд (+2,7%) болды.
Алайда экспорт 6,4%-ға қысқарып, 30,4 млн тонна немесе $9,5 млрд-ты құрады. Экспорттың негізгі бөлігін кен мен концентраттар – 5,3 млн тонна (-11,4%), қара металдар және олардан жасалған өнімдер – 1,8 млн тонна (-17,7%), сондай-ақ уран – 9,9 мың тонна (-12,6%) құрады.
Сонымен қатар, импорт 4,2%-ға төмендеп, 24,5 млн тоннаға жетті. Бірақ ақшалай есептегенде, керісінше, 8,3%-ға өсіп, $18,2 млрд болды.
Қазақстан қара металдар мен одан жасалған өнімдерді 7,8%-ға көбірек сатып алды (3,4 млн тонна).
Ал мұнай өнімдері, мұнай газы және битум жеткізу 13,4%-ға төмендеп, 1,1 млн тоннаны құрады. Сондай-ақ пластмасса мен одан жасалған өнімдердің импорты 24,5%-ға қысқарып, 2,3 млн тоннаны құрады.
Өзара инвестицияға келсек, 2024 жылдың қаңтар-қыркүйек айларында Ресейден Қазақстан экономикасына салынған инвестиция көлемі 43,7%-ға өсіп, $2,8 млрд-қа жетті.
Ал қазақстандық инвесторлар Ресей экономикасына бұдан 9,6 есе аз қаржы құйды – $170,6 млн. Салыстыру үшін: 2023 жылдың тоғыз айында бұл көрсеткіш $1,6 млрд болған.
Көші-қонда да төмендеу байқалды. 2024 жылы Ресейден Қазақстанға 8,1 мың адам көшіп келген (-30,3%).
Ал көрші елге қоныс аударған қазақстандықтардың саны 24,9%-ға азайып, 8,8 мың адамды құрады.
Фото: Getty Images.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
