6-8 маусым аралығында ұзақ демалыс күндері болады
Маусым айы Қазақстан халқы үшін бірқатар маңызды оқиғалар мен жаңалықтарға толы болмақ, деп хабарлайды El.kz.
Маусым айындағы басты мереке – Құрбан айт
Маусым айында Қазақстанда Құрбан айт мерекесі атап өтіледі. Биылғы Құрбан айт 6 маусым жұма күніне түсіп отыр. Осылайша, 6-8 маусым аралығында ұзақ демалыс күндері болады. Жалпы, бес күндік жұмыс аптасы барлар үшін – 10 күн, ал алты күндік жұмыс аптасы барлар үшін – 6 күн демалыс күтілуде. Бұл қазақстандықтарға жақсы демалып, жақындарымен бірге уақыт өткізуге мүмкіндік береді.
Әуе рейстерінің жаңалығы
1 маусымнан бастап БАӘ-нің Air Arabia Abu Dhabi әуе компаниясы Қазақстанға тікелей рейстерді бастайды. Алматы мен Абу-Даби арасындағы ұшақтар аптасына үш рет — сейсенбі, жұма және жексенбі күндері қатынайды. Бірінші рейс – 3 маусымда орындалады.
Сонымен қатар, Air Astana 4 маусымнан бастап Алматы – Вьетнамның Дананг қаласы бағытына тікелей рейс ашады. Бұл рейстер аптасына екі рет — сәрсенбі және сенбі күндері ұшады. Билеттердің бағасы 360 701 теңгеден басталады.
Қосымша пойыздар мен жолаушылар тасымалы
Маусымнан қыркүйекке дейін елімізде 11 қосымша теміржол бағыты ашылады.
- “Алматы - Жаланашкөл” бағытында пойыздар кейбір күндері жүреді.
- “Астана - Достық” бағыты – аптасына екі рет.
- “Алматы - Достық” – күнара.
- “Семей - Достық” және “Өскемен - Достық” – күнара.
- “Астана - Алматы” және “Астана - Шымкент” бағытындағы пойыздар күн сайын қатынайды.
Бұл жаңашылдық 270 мыңнан астам жолаушыны қосымша тасымалдауға мүмкіндік беріп, халықтың жолға шығу мүмкіндігін арттырады.
Жүк көліктеріне шектеу шаралары
1 маусымнан бастап ауа температурасы +25 °C-тан жоғары болған жағдайда ауыр жүк көліктерінің қозғалысына уақытша шектеу енгізіледі.
- Оңтүстік және батыс өңірлерде: 1 маусым – 31 тамыз аралығында сағат 10:00 – 22:00.
- Солтүстік және шығыс өңірлерде: 1 маусым – 15 тамыз аралығында сағат 11:00 – 21:00.
Бұл шектеу асфальт жамылғысының бұзылмауы үшін қолға алынып отыр.
Смартфондарды тегін верификация мерзімі ұзартылды
Смартфондарды тегін верификациялау мерзімі жеке тұлғалар үшін 25 маусымға дейін ұзартылды. Бұл шара заңсыз әкелінген немесе ұрланған құрылғылардың саудасын болдырмауға бағытталған. 25 мамырдан бастап импорттаушылар үшін верификация ақылы болып, заңды құжаттар талап етіледі.
Мектеп бітіру емтихандары
9 және 11 сынып оқушылары үшін мемлекеттік емтихандар 29-30 мамырда басталады.
- 9-сыныптар: математика, таңдау пәні және екі тілдік емтихан.
- 11-сыныптар: Қазақстан тарихы, алгебра, таңдаулы пән және екі тілдік емтихан.
9-сыныптардың соңғы емтиханы – 10 маусымда, ал 11-сыныптардікі – 16 маусымда өтеді. Аттестаттарды табыстау салтанаты 18-20 маусым аралығында ұйымдастырылады.
Фото: freepik.com.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
