Мәжілісте зияткерлік меншік мәселелері бойынша заңнамаға енгізілетін түзетулер талқыланып жатыр
Бұл өзгертулер авторлық құқық саласын қалай жақсартады? Агенттік Kazinform тілшісінің сауалына Әділет министрлігі түсінік берді.
"Қазақстан Республикасының кейбір заңнамалық актілеріне зияткерлік меншік мәселелері бойынша өзгерістер мен толықтырулар енгізу туралы" заң жобасының негізгі мақсаты:
— авторлардың және басқа авторлық құқық иеленушілердің құқықтарын нақтылау (ретрансляция бойынша);
— көру қабілеті бұзылған адамдардың туындыларға, оның ішінде оларды таратуға және көпшілік алдында орындауға қол жетімдіболуын жақсарту;
— тауар таңбаларын жеделдетіп тіркеуді енгізу (7 айдан 3 айға дейін);
— тауар таңбасын тіркеуге қарсылық білдіру мерзімін ұлғайту (1 айдан 2 айға дейін);
— тауар белгілерін тіркеуден бас тарту негіздерін нақтылау;
— формальды сараптама сатысында өнертабысқа патент беруден бас тарту мүмкіндігі.
Сонымен қатар "Авторлық құқық және сабақтас құқықтар туралы" Заңды халықаралық стандарттарға сәйкестендіру мақсатында хабар тарату және кабельдік хабар тарату ұйымдарының айрықша құқықтары бойынша өзгерістер қарастырылып жатыр.
Мұнымен қоса, көру қабілеті бұзылған адамдар үшін жасалатын мүмкіндік аясы кеңейтіліп жатыр. Мәселен, Брайль қарпімен немесе басқа арнайы құралдар арқылы тиісті форматтар қамтылады.
Даулы түзетулер
Еске салайық, былтыр Әділет министрлігі авторлық құқықты ұжымдық басқару функцияларын мемлекеттік монополияға беруді ұсынған болатын. Алайда қазақстандық авторлар мен сарапшылар бұл өзгерістерге қарсы болды. Олардың пайымынша, осы түзетулер монополияға алып келеді және Конституция мен халықаралық нормаларға қайшы. Әділет министрлігі бұл ұсыныс енді талқыланбайтынын растады.
Еске салсақ, биыл ақпан айында авторлық құқық мәселесіне мемлекеттік монополия енгізу ұсынысы неге қабылданбағанын жазған едік.
Таяуда Мәдениет және ақпарат министрінің орынбасары Евгений КОЧЕТОВ Үкімет отырысынан кейін өткен баспасөз мәслихатында тойханалар мен караоке-барлардың авторлық құқық төлемдерін цифрландыру туралы пікір білдірді.
Фото: iStock.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
