Енді ол мас күйде көлік жүргізгені үшін ғана емес, лауазымды тұлғаға пара беру әрекеті үшін де жауап береді
Ақтөбеде мас жүргізуші патрульдік полиция қызметкеріне пара беруге тырысты, деп хабарлайды Polisia.kz.
Оқиға 27 қарашаға қараған түні Ақтөбе қаласында болған. Патрульдік полиция инспекторы қызмет барысында Hyundai Elantra автокөлігін тоқтатып, жүргізушіден алкогольдің өткір иісін байқады.
Осыған байланысты полицей оны медициналық тексеруден өткізу үшін жіберді. Тексеру нәтижелері полицейдің болжамдарын растады.
Мас күйінде көлік жүргізген 52 жастағы жүргізуші құжаттарды рәсімдеу кезінде әкімшілік хаттама толтырмауды сұрап, инспекторға 10 000 теңге пара ұсынды. Полиция қызметкері дереу оқиға орнына жедел-тергеу тобын шақырып, пара ұсынғаны үшін жүргізушіге қатысты ҚР Қылмыстық кодексінің 367-бабы 1-бөлігі бойынша қылмыстық іс қозғалды.
Заттай айғақ ретінде пара тәркіленіп, көлік коммуналдық тұраққа қойылды, ал жүргізуші қамауға алынды.
Енді ақтөбелік тек мас күйінде көлік жүргізгені үшін ғана емес, сонымен қатар лауазымды тұлғаға пара беру әрекеті үшін де жауап береді.
Оған мүлкі тәркіленіп, параның жиырма еседен отыз есеге дейінгі сомасы мөлшерінде айыппұл салу немесе бес жылға дейін бас бостандығынан айыру жазасы қолданылуы мүмкін.
Фото: Halyq Uni.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
