Экс-орманшы мен оның танысы Семей орманынан жарты миллиард теңге тұратын көшетті “зып еткізген”
Абай облысының сотында да небір істер қаралып жатады: күні кеше қорықтың бұрынғы қызметкері мен оның танысының ісі қаралды. Бұл екеуі жыл сайынғы көшет отырғызу шарасына арналған көшеттердің күзетілмей тұрғанын пайдаланып, “ақша жасап” қалуға тырысқан екен.
Екі дос “Семей Орманы” мекемесінің Долон филиалына қарасты Грачев орман шаруашылығына барып, ондағы “қарағай көшеттері” сақталып тұрған жерге тоқтаған. Сосын маңайда ешқандай “күзет-мүзеттің” жоқтығына көз жеткізген соң, жалпы құны 500 млн теңгеден асатын 264 426 дана көшетті көлігіне тиеп, үндемей ғана ұрлап кеткен.
Ұрланған көшеттерді сату үшін Павлодар қаласына қалай тартқан. Ақыр аяғында “ірі көлемде бөтеннің мүлігін алдын ала сөз байласып топтасып ұрлады” деген ауырлау айыппен (ҚР ҚК 188 бабы 4-бөлігі 3-тармағы) сотқа тартылды.
Бұл бап бойынша жаза ретінде 5 жылдан 10 жылға дейін бас бостандығынан айыру және мүлікті тәркілеу қарастырылған. Прокурор екі ұрының әрқайсысына 5 жыл бас бостандығынан айыру жазасын сұрады.
Айыпталушылар кінәсін мойындап, бұл ұрлықтың ұйымдастырушысы бұрын “Семей Орманы” мекемесінде жұмыс істегенін, көктем сайын көшет отырғызу жұмыстары жүргізілетінін білетінін айтты. Сол себепті ол танысына “қарағай көшеттерін ұрлап, оны Павлодарға апарып сатып жіберейік” деген ұсыныс жасағанын мойындады. Олар соттан бас бостандығынан айырмайтын жаза тағайындауды сұрады.
Сот екі ұрының енді шын жүректен өкініп отырғанын көріп, жазаны жеңілдетуді жөн деп тапты. Сотталушылар ҚР ҚК 188 бабы 4-бөлігі 3-тармағы бойынша кінәлі деп танылып, орташа қауіпсіздік деңгейіндегі түзеу мекемесінде 5 жылға бас бостандығынан айыру жазасына кесілді.
Жетісіп жүрмеген жандар екені ескеріліп, “мүлікті тәркілеу” деген қосымша жаза қосылған жоқ.
Үкім заңды күшіне енген жоқ.
Фото: iStock.
Аударған: А.Олжаев.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
