Облыста медициналық мекемелерді жүйелі түрде заманауи техникамен жабдықтау жұмыстары жүргізіліп жатыр
Абай облысының әкімі Нұрлан ҰРАНХАЕВ әкімдік жиналысын өткізіп, бірқатар маңызды мәселелерді талқылады, деп хабарлайды ҚазАқпарат.
Жиналыс барысында жаңа оқу жылына дейін мектептерді жөндеу, ауруханаларды заманауи медициналық жабдықтармен қамтамасыз ету және алдағы жылыту маусымына дайындық жайы сөз етілді. Аймақ басшысы мектептердегі жөндеу жұмыстары барысын қатаң бақылауға алып, мердігерлермен жұмысты күшейтуді тапсырды.
- Жаңа оқу жылына дейін барлық жөндеу жұмыстары аяқталуы қажет. Білім ордаларындағы оқу процестерінің қауіпсіздік шараларын алдын ала ұйымдастыруды тапсырамын, - деді Нұрлан Ұранхаев.
Бүгінде облыста медициналық мекемелерді жүйелі түрде заманауи техникамен жабдықтау жұмыстары жүргізіліп жатыр.
- Денсаулық сақтау басқармасы минималды стандарттарға сәйкес медициналық мекемелерді сапалы техникамен жабдықтауды қатаң бақылауға алуы қажет. Сондай-ақ халық саны аз елді мекендерде үнемі жүйелі түрде міндетті әлеуметтік медициналық сақтандыру туралы үгіт-насихат жұмыстарын жүргізу керек - деді әкім.
Бүгінде ең маңызды мәселелердің бірі – жылумен қамтамасыз ету. Нұрлан Ұранхаев қала және аудан әкімдеріне халық арасында көмірді жазғы уақытта сатып алу туралы түсіндіру жұмыстарын жүргізу қажеттігін атап өтті.
- Қаражыра» акционерлік қоғамымен бірлесіп әлеуметтік осал топтағы азаматтарға көмірді әлеуметтік бағамен сату туралы ұсынысты 10 күн аралығында енгізулеріңіз қажет. Семей, Аягөз қалаларының және Абай ауданының әкімдеріне Энергетика басқармасымен бірлесіп, жылу жүйелері мен қазандықтардың жөндеу жұмыстарын 30 қыркүйекке дейін аяқтауды тапсырамын, - деді өңір басшысы.
Еске салсақ, осыған дейін Абай облысында 40 мыңға жуық оқушы тегін тамақпен қамтылатыны туралы хабарланған.
Фото: dauletten.kz.
