Қу арақтың кесірінен өзінің ұлын өлтіріп қоя жаздаған ғой
Шымкент қаласының қылмыстық істер жөніндегі ауданаралық соты судья Сәбит ТӨРЕХАНОВТЫҢ төрағалығымен 1964 жылы туған жергілікті тұрғын Кәрімқұл М.-ға қатысты қылмыстық іс материалдарын қарады. Оған ҚР Қылмыстық кодексінің 106-бабының 1-бөлігі бойынша (жәбірленушінің денсаулығына ауыр зиян келтіру) айып тағылған болатын.
Тергеу барысында анықталғандай, биыл 25 қыркүйекте шамамен сағат 15:00-де айыпталушы өз үйінде спирттік ішімдіктер ішкен. Отағасы Кәрімқұлдың арақтың құлына айналғанына наразылық білдіріп, онымен 35 жастағы ұлы мен әйелі жанжалдасқан екен. Жанжал барысында не істеп не қойғанын білмейтін күйге дейін қатты мас болған Кәрімқұл қолына түскен пышақпен ұлының кеудесінен ұрыпты. Әйелі жедел жәрдем шақырды. Ұлы ауыр жағдайда қалалық аурухананың жансақтау бөліміне жатқызылған. Өміріне кәдімгідей қауіп төнген. Құдай сақтап, дәрігерлердің жедел араласуының арқасында жас жігіт ажалдан аман қалды.
Кәрімқұлды полиция әкетіп, ол сот санкциясымен қамауға алынып, тергеу изоляторына кете барды. Оның үстінен қылмыстық іс қозғалды. Қамауға түскен соң есін жиып, не бүлдіргенін түсінген соң ол инфаркт алған. Оны да ауыр жағдайда ауруханаға жатқызуға тура келді. Екі ай емделген соң ол сот алдында жауап берді.
Сотта Кәрімқұл өз кінәсін толық мойындап, өте қатты өкінді. Енді ішсем ит боп кетейін деп, арақты мүлдем қойғанын айтып, ұлынан кешірім сұрады. Жәбірленуші сотталушыға еш шағым айтпады.
Сот жазаны жеңілдететін мән-жайлардың бәрін ескере отырып, Кәрімқұлды 3 жыл 6 айға шартты түрде бас бостандығынан айыру туралы үкім шығарды. Артық етпес деп, Кәрімқұлға тұрғылықты жері бойынша алты айлық мерзімге мәжбүрлі түрде алкогольге тәуелділіктен емдеуді тағайындады, өйткені сот-медициналық сараптама о кісінің алкоголизмнің 2-дәрежесіне жеткен адам екенін анықтап берген. Сотталғаннан 84 309 теңге көлемінде сот шығындары және 73 840 теңге көлемінде Жәбірленушілер қорына мәжбүрлі төлем өндірілетін болады.
Фото: ашық дереккөзден.
Аударған А.Олжаев.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
