Діттеген жеріне жетпеген техника
Қарашаның орта шенінде Қызылорда облысының әкімі Гүлшара ӘБДІҚАЛЫҚОВА 40 жедел жәрдем автокөлігінің кілтін орталық алаңда салтанатты түрде табыстаған болатын. Бұл, шын мәнінде, көптен күткен жаңалық еді. Себебі, ескі көліктердің әлдеқашан тозығы жеткен, іші суық, шақыруға кешігіп барады. Міне, енді сапалы медициналық жәрдем аламыз деген қызылордалықтардың үміті "армандапсың ақ тоқты қыстың күні көк шөпті" болатындай.
Желтоқсан келді. Ал, сол 40 автокөлік әлі күнге дейін көпбейінді медициналық орталықтың ауласында қар басып қаңтарылып тұр.
- Автокөліктердің техникалық құжаттарына қатысты мәселе туындаған болатын. Сақтандыру полисі, мемлекеттік номерлерін алу керек. Алдағы күндері кезең-кезеңімен шешіледі деген ойдамыз, - дейді Қызылорда облыстық жедел-жәрдем стансасының бас дәрігері Алмат ҚҰРМАНҒАЛИ.
Айта кету керек, жаңа санитарлық көліктер қосымша құрылғылармен қамтылған. Ішіндегі оттегінің көлемі ескі үлгідегі жедел-жәрдем көліктерінен 2-3 есе көп. Коронавирустың екінші толқыны күшеймей тұрғанда жедел жәрдем көліктері діттеген жеріне жетсе болар деген тілек бар.
Фото: Ⓒ Ratel.kz / Айнұр ТҰҢҒЫШБАЕВА.
