90 пайызымыз "иә" деп дауыс бере салар ма екенбіз?
Тәуелсіз Қазақстан тарихындағы тұңғыш референдум 1995 жылы өткен.
Ондағы жалғыз сауал – "Нұрсұлтан НАЗАРБАЕВТЫҢ президенттік өкілеттігін 2000 жылдың 1 желтоқсанына дейін созуға келісесіз бе?" (сайлау өткізіп әуре болмай-ақ) деген сауал еді.
Сол референдумға бірдеңеден құр қалатындай дауыс берушілердің 91 пайызы келіп, оның 95 пайызы "иә, қолдаймын" деп дауыс берген.
Тәуелсіздіктің буынан мастығы әлі тарқамай, басы ауырып тұрған халық едік сол кезде.
Оңбай қателескенімізді қанды қаңтар көрсетті. Сол референдумның кесірінен кейінгі отыз жылдың ішінде Қазақстан тоналып, әбден адасып, тіпті құри жаздап, әрең аман қалды.
Енді ел мен жерге тиетін зұлматы одан да асып түсуі мүмкін мәселені көтерген тағы бір референдум есіктен қақты.
Президенттің аузынан "А" деген дауыс шықса аттандай жөнелетін "Аманат" партиясы науқанға белін шешіп кірісіп кетті, әне. Олар да әйтеуір белгісіз бірдеңенің буынан мас болып жүр.
Осыған дейінгі үш референдумда да "иә-иә" деп бас шұлғи берген Қазақстан халқы "жоқ" дей ала ма, өзі?
Соны тексеріп көру үшін билік "Өлуге көнесіз бе" деген сауалды референдумға шығарса?...
Әлде, шығарып қойды ма ондай сауалды?
Үйдің жанындағы мемлекеттік емхананы "нөмірі пәленбай сайлау уческесі" деп жазуларын жапсырып дайындап жатыр екен. - Қандай сайлау өткелі жатыр? деп сұрасам, - "Атомный бомба жайында", - деп жайбарақат жауап береді бір медбике.
Солай.
АЭС пе, атом бомбасы ма, бәрібір сияқты шынымен...
Фото: AFP/BBC.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
