Қазақстан әлем бойынша жанар-жағармай бағасы ең төмен елдердің бірі болып отыр
Қазақстан жанар-жағармай бағасын мемлекеттік реттеуден бас тартпақ.
Энергетика министрінің бұйрығы жазылған жоба электрондық үкіметтің “Ашық НҚА” порталында талқылауға шығарылды. Талқылауға небәрі 5 күн берілген екен. Бұл дегеніміз – саяси шешімнің қабылданып қойғанын білдірсе керек.
Бензин мен дизель отынының бағасы тұп-тура 1-ші ақпаннан бастап күрт өсе жөнелмейді. Өйткені халық тағы көтеріліп, оның арты наразылықтар мен әлеуметтік шиеленіске әкелуі мүмкін. Сондықтан, бұл арада бағаны біртіндеп көтеру әдісі қолданылмақ болса керек.
Сарапшылар Қазақстанда бензин бағасын қолдан шектеуді доғарудың уақыты баяғыда жеткенін жоққа шығармайды. Энергетика министрлігі баспасөз хабарламасында атап өткендей, қазіргі уақытта Қазақстан әлем бойынша жанар-жағармай бағасы ең төмен елдердің бірі болып отыр. Соның кесірінен “бензин тапшылығы, саланы модернизациялау мүмкін болмай, отынның түрлі заңсыз схемалар арқылы шетелге шығарылуы” орын алып жатыр.
Мысалы, Қазақстанда бензиннің шекті бағасы литріне 205 теңге. Оны “сұр схема” арқылы немесе бензин бактары мен канистрлермен кедендік шекарасыз Ресейге шығарса – 288 теңгеге сатуға болады. Ал Кедендік одаққа кіретін Қырғызстанда бензин литрінің бағасы 385 теңгеге дейін жетеді. Қазақстанда дизель отынының бағасы литріне 295 теңге болса, Ресейде орташа алғанда 355 теңге, ал Қырғызстанда 427 теңге.
Бюджетке кедендік алымдар арқылы түк те түспейді, ал баға айырмашылығы мұнай өңдеу зауыттарын жаңғыртуға емес, “сұр” және “қара” экспорттаушылардың қалтасына кетіп жатыр.
Үкіметтің қазіргі басты уайымы – инфляция. Сарапшылардың мәліметінше, бензиннің 10%-ға қымбаттауы инфляцияны 1%-ға арттыруы мүмкін.
Дереккөз: t.me/oilgazKZ – Олег Червинскийдің Telegram-каналы. Автордың рұқсатымен жарияланды.
Фото: sknews.kz.
Аударған: А.Олжаев.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
