Кәрім Мәсімов 2022 жылғы Қаңтар оқиғалары кезінде қамауға алынған
Қайтарылған активтерді басқару компаниясы Ерейментау, 1 мекенжайында, елорданың Нұра ауданында орналасқан жертөлесі бар үлкен үйді сатуға қойды, деп хабарлайды Informburo.kz.
Нысанның бастапқы бағасы 1,8 млрд теңге, ал кепілдік жарнасы 117,9 млн теңге. Сауда 25 ақпан күні сағат 10:00-де өтеді.
Үйдің суреттері 2022 жылы ҚР ҰҚК Кәрім МӘСІМОВ қамауға алынғаннан кейін жарияланған суреттерге ұқсайды. Сол кезде тергеу барысында комитеттің экс-төрағасының іс-әрекеттерінен бірқатар сыбайлас жемқорлық белгілері анықталған болатын. Оның ішінде құқық қорғау органдары заңсыз жолмен жылжымайтын мүлік алу фактілерін құжаттаған.
Техникалық паспорттағы мәліметтерге сәйкес, нысан аумағында жуыну мен дәретханаға арналған 30-дан астам санитарлық торап бар.
Кәрім Мәсімов 2022 жылғы Қаңтар оқиғалары кезінде қамауға алынды. Оның ісі бойынша қозғалған қылмыстық іс “құпия” боп қалды. 2023 жылғы сәуірдің соңында Астана соты оны мемлекетке опасыздық жасау, билікті күшпен басып алу әрекеті, билікті асыра пайдалану және қызметтік өкілеттіктерін теріс пайдалану баптары бойынша 18 жылға бас бостандығынан айыру жазасына кесті.
Ол үкімге шағым түсіргенімен, апелляциялық сот жазаны өзгеріссіз қалдырды.
2024 жылдың жазында мемлекет басшысы мемлекетке опасыздық жасаған және билікті басып алуға әрекеттенгені үшін сотталған ҰҚК-нің бұрынғы басшысы Кәрім Мәсімовке кешірім беруден бас тарту туралы шешіммен келісті. Ол бұл өтінішті наурыз айында берген болатын.
Фото: ҚР ҰҚК.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
