ҚТЖ компаниясының мамандары бұл мәселеге араласа алмайтындарын айтады
Ақтөбе облысы Қандыағаш қаласында жүк вагондарын жөндейтін азаматтар жұмыссыз қалуы мүмкін. Себебі, жекеменшік компаниялардың бірі штат санын азайтып, жаппай қысқартуды жөн деп шешкен, деп хабарлайды Информбюро 31.
Бірақ бұған зейнет жасына жақындаған жандар келіспейді. Теміржол саласында ұзақ жылдық тәжірибесі бар мамандар далада қалудан қорқады.
Таңның атысы, кештің батысы вагон жөндеп тер төгетін бұл азаматтардың көңілі күпті. Астанадан келген хабарламадан кейін көбінің дегбірі қашқан. Өйткені, барлығы бір-бір үйдің жалғыз асыраушысы. Әсіресе, зейнет жасына жақындағандар екі қолға бір күрек таппай қаламыз ба деп алаңдайды.
- Қысқарту жайы айтылған жоқ 22 сәуір күні мобильді телефон арқылы гендиректор селекторный совещание өткізді. 15-інен бастап адамдар қысқарады деді. Түнгі смена болмайды деді. Бізде 20-30 жылдан бері жұмыс істеп келе жатқан адамдар бар. Қалай болады, не болады түсінбедік, - дейді жұмысшы Ерлан ЕЛЕУ.
Жалпы, бұл жерде бас-аяғы 26 адам жұмыс істейді. Олар басшылықтың шешімімен келіспейді. Алдын ала ескертпей, келісімшартты бұзу заңға да қайшы дейді. Сондықтан бұл мәселені қайта қарауды сұрап отыр.
- Әрқайсысының балалары бар. Жан-жағында. Солар далада қалады. Тоғыз адамда жоқ дегенде 3-4 баладан бар. Кім кормить етеді? Бәріміз де бір айлыққа қарап отырған адамбыз, - дейді жұмысшы Алпамыс ТІЛЕУБЕРГЕНОВ.
Ал серіктестік өкілі қызмет көрсетуге арналған келісімшарттың мерзімі 15 мамырда аяқталатынын айтты. Конкурста жеңсек, жұмысшылар далада қалмайды, деп сендірді.
- Бізде “Деповской сервис” мекемесінде жалпы 16 ағымдағы жөндеу бекеттері жалға алынған. Сол 16 бекеттегі жұмыс істейтін жұмысшылардың бәріне де жаңағыдай хабарлама берілген. Біздің жобамыз 15-ші мамырға дейін болған. 16-сынан бастап, егер біз ұтатын болсақ ол конкурсты, сіздермен тағы да келісімшарт жасалады 31-ші желтоқсанға дейін. Міндетті түрде ол кісілердің ешқайсысы жұмыссыз қалмайды, - деді “Деповской сервис” ЖШС бөлім басшысы Қанат ЖАҢАБЕРГЕН.
Бірақ шағымданушылар жекеменшік компания өкілдері сөзінде тұрмаса құзырлы органдарға хат жазбақ. Ал Қазақстан Темір жолы компаниясының мамандары бұл мәселеге араласа алмайтындарын айтады.
Фото: Информбюро 31.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
