Оған қазынадан 5 млрд теңгеге жуық ақша бөлінген
Соңғы он жылда отандық ғалымдар небәрі екі-ақ дәрі ойлап тауыпты, деп хабарлайды КТК телеарнасы.
Бірі – кәдімгі қарапайым қолданыстағы йод, екіншісі де калий йодиді екен. Оның өзінде қазынадан 5 млрд-қа жуық ақша бөлінген бұл ем-дом заттарының біреуі де формулярға енгізілмеген, яғни қолданыста емес.
- Дәріні тіркеу үшін, өте күрделі бюрократиялық рәсімдерден өту керек. Әрине мұндай қиындықтардан өту, тек алпауыт фармацевтикалық компаниялар және қымбат препараттар үшін мүмкін. Нәтижесінде, арзан, бірақ науқастар үшін ауадай қажет дәрілер тіркелмей қалады. Өйткені ол үшін жүгіретін ынта да жоқ, қызығушылық та жоқ, - деді Мәжіліс депутаты Асхат АЙМАҒАМБЕТОВ.
Фармацевтика саласындағы бар былықты депутаттар алдына жайып салған Жоғары аудиторлық палата саланың әбден қожырағанын айтты. 45 мың пациент дертіне дауа болатын дәрісін таппай сандалып қалған. Барлығына себеп - қажетті препараттар қоймаларда шіріп, өмірлік маңызы бар дәрілер жетер жеріне жетпеген. Осылайша 21 млрд теңге ысырап болып, саланың берекесі кетіпті. Ал бұған жол бергендер тек жұмысынан шығарылып, қылмыстық жауапкершілікке тартылмаған. Сондықтан депутаттар жазадан оңай сытылып кеткендердің атын атап, түсін түстеп, құзырлы органдарға қайта табыстауды ұсынды.
- Мәселен 2024 жылы еліміздегі мына нарықта бар дәрі-дәрмектің 84 пайызы шетелдік өнім екені белгілі болды. Қала берді мына соңғы 5 жылда біздің шетелдерден сатып алған дәрі-дәрмекке жұмсағанымыз 1, млрд доллардан 1,7 млрд долларға дейін жетті. Ал өзіміз білеміз мемлекет басшысы отандық дәрі-дәрмектің үлесі елу пайыз болу керек деді. Бұған қалай жетпек екені түсініксіз, - деді Мәжіліс депутаты Нартай СӘРСЕНҒАЛИЕВ.
Фото: wikimedia.org.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
